Ár adam memleket kepildik bergen tegin medıtsınalyq kómek alýǵa quqyly

NUR-SULTAN. QazAqparat – Áleýmettik medıtsınalyq saqtandyrý qorynda saqtandyrý mártebesi bolmaǵan jaǵdaıda, azamattarǵa Tegin medıtsınalyq kómektiń kepildik berilgen kólemi (TMKKK) paketi boıynsha tegin medıtsınalyq qyzmet kórsetiledi. Bul týraly Áleýmettik medıtsınalyq saqtandyrý qory basqarma tóraǵasy Bolat Tókejanov málim etti, dep habarlaıdy QazAqparat tilshisi.

«Eger adam saqtandyrylmaǵan bolsa da, ol memleket kepildik bergen tegin medıtsınalyq kómek alýǵa quqyly. Odan eshbir medıtsınalyq uıym bas tartpaýy kerek. Biz azamattardyń qorǵa jazǵan shaǵymdaryn óte muqııat qaraımyz», - dedi B. Tókejanov Ortalyq kommýnıkatsııalar qyzmetinde.

Onyń sózine qaraǵanda, sozylmaly aýrý bolsa, azamattar áleýmettik máni bar dertter jáne dınamıkalyq baqylaýǵa jatatyn sozylmaly aýrýlar boıynsha esepte tursa, onda beıindi mamannyń qabyldaýy TMKKK paketi boıynsha júzege asyrylady. Qazir Qorǵa Qoldau 24/7 qosymshasy jáne áleýmettik jeliler arqyly kepildendirilgen kómek kórsetýden bas tartqan emhanalar týraly shaǵymdar jıilep ketti.

«Taǵy da qaıtalaımyn, TMKKK paketine kiretin kómekti kórsetýden bas tartýǵa jol berilmeıdi. Sonymen qatar, saqtandyrylǵan azamattarǵa medıtsınalyq kómek qyzmetterdiń keńeıtilgen tizbesi boıynsha kórsetiledi», - dedi Qor basshysy.

MÁMS paketinde medıtsınalyq kórsetkishter boıynsha ınfarkt, ınsýlt, túrli jaraqattar men operatsııalyq aralasýlardan keıin, sondaı-aq balalardyń sozylmaly aýrýlary kezinde patsıentter úshin medıtsınalyq ońaltý qoljetimdi.

«Árıne, bıyl elimizdiń densaýlyq saqtaý júıesi úshin úlken synaq boldy. Pandemııa medıtsınalyq saqtandyrý esebinen usynylatyn konsýltatsııalarǵa, dıagnostıkaǵa, ońaltýǵa qoljetimdilikti arttyrý boıynsha bizdiń josparlarymyzdy ózgertti. Emhanalar men aýrýhanalar endi qalypty rejımge oraldy jáne halyqqa josparly kómek kórsetýde», - dedi Tókejanov.