AQR qorytyndysy boıynsha josparlar bankterdiń bıznes-protsesterin túrlendirýge kómektesedi – Smolıakov

ALMATY. QazAqparat – AQR (Asset Quality Review – Aktıvterdiń sapasyna sholý) qorytyndysy boıynsha josparlar bankterdiń negizgi bıznes-protsesterin túrlendirýge kómektesedi. Bul týraly QR Qarjy naryǵyn retteý jáne damytý agenttigi tóraǵasynyń birinshi orynbasary Oleg Smolıakov ekinshi deńgeıli bank aktıvteriniń sapasyn baǵalaý qorytyndysyna arnalǵan baspasóz máslıhatynda aıtty, dep habarlaıdy QazAqparat tilshisi.

«Qalyptastyrylǵan josparlar bankterdiń negizgi bıznes-protsesterin aıtarlyqtaı ózgertýge kómektesedi. Bul olardyń jumys sapasyn jáne klıentter úshin yńǵaılylyqty jaqsartady», – deıdi Oleg Smolıakov

Onyń aıtýynsha, bankter boıynsha qalyptasqan is-sharalar jospary QR qadaǵalaý tarıhynda buryn-sońdy bolmaǵan jaǵdaı bolyp tabylady. Sebebi bank provızııalary men kapıtalyn esepteý protsesterin ǵana emes, sonymen qatar bıznes-protsesterdi jáne bankterdiń táýekelderin basqarý protsesterin irgeli túrlendirýge ákeledi.

«AQR baǵdarlamasyn aıaqtaý qarjy sektoryn qalypqa keltirý boıynsha retteýshiniń is-áreketin qorytyndylaıdy. Odan ári Agenttik AQR nátıjeleri boıynsha sharalardy oryndaý jáne baqylaý boıynsha qoldaý is-sharalaryn júrgizetin, sondaı-aq táýekelge baǵdarlanǵan qadaǵalaý negizinde qarjylyq turaqtylyqqa monıtorıngti júzege asyratyn bolady», - dep qorytyndylady O. Smolıakov.

Búgin, ekinshi deńgeıli bankter aktıvteriniń sapasyn táýelsiz baǵalaý nátıjeleri shyǵaryldy.