Aptalyq valıýta baǵamy: Teńge 0,3% nyǵaıyp, Reseı rýbli 0,5% álsiredi

NUR-SULTAN. QazAqparat – QR Ulttyq banki 21-28 qańtar aralyǵyndaǵy jekelegen damýshy elderdiń valıýtalaryna sholý jarııalady, dep habarlaıdy QazAqparat tilshisi.

Ulttyq bank málimetine sensek, 28 qańtardaǵy saýda-sattyq qorytyndysy boıynsha, teńgeniń naryqtaǵy baǵamy bir aptada 0,3% (435,10-dan) nyǵaıyp, bir AQSh dollaryna shaqqanda 433,83 teńge deńgeıinde qalyptasqan.

Al Úndistan, Túrkııa, Indonezııa, Meksıka, Ońtústik Afrıka, Reseı sııaqty damýshy elderdiń tól valıýtalary dollardayń kóleńkesinde álsiregen. Tek Brazılıa realy kerisinshe sál nyǵaıǵan. Biraq ár valıýtanyń álsireýine ár túrli sebepter áser etip otyr.

25-26 qańtar aralyǵynda ótken Ashyq naryqtar jónindegi federaldy komıtet (FOMC) otyrysynyń qorytyndysy boıynsha AQSh bazalyq mólsherlemeni ózgerissiz qaldyrdy. Alaıda, naýryz aıyna josparlanǵan otyrysta bazalyq mólsherleme kóterilýi múmkin ekeni aıtyldy.

«Federaldyq rezervtik júıe oblıgatsııalardy satyp alý tipti toqtatatynyn habarlady. Osyndaı málimetterden keıin damýshy elder valıýtalarynyń AQSh dollaryna qatysty baǵamdarynyń dınamıkasy kelesideı qalyptasty», - dep jazylǵan Ulttyq banktiń resmı saıtynda.

Brazılııa realy 1,3% nyǵaıdy (5,45-ten 5,38-ge deıin). Buǵan eks-prezıdent Lýıs Inasıý Lýla da Sılvanyń ortalyqshyl partııalarmen odaqtasý yqtımaldyǵy týraly málimdemesine baılanysty sheteldik kapıtaldyń aǵylýy sebep bolǵan kórinedi.

Indonezııa rýpııi 0,3% (14336-dan 14375-ke deıin) álsiredi. Oǵan elde «omıkron» shtamyn juqtyrý jaǵdaıynyń órshýi men AQSh FRJ málimdemesi sebep bolǵan.

Reseı rýbli Batyspen arasdaǵy geosaıası shıelenistiń ósýi aıasynda 0,5% (77,73-ten 78,15-ke deıin) álsiredi.

Túrik lırasy AQSh-tyń oblıgatsııalar týraly «qatań» rıtorıkasyna baılanysty 0,7% (13,45-ten 13,55-ke deıin) álsiredi.

Úndi rýpııi jahandyq shıki munaıdyń turaqty baǵasy turaqtalǵanyna baılanysty 0,8% (74,43-ten 75,04-ke deıin) álsiredi.

Meksıka pesosy ınvestorlardyń saqtyqqa kóshýi jáne AQSh dollarynyń nyǵaıýy aıasynda 1,7% (20,47-den 20,81-ge deıin) álsiredi.

Ońtústik Afrıka randy eldegi Ortalyq banktiń (SARB) eseptik mólsherlemeni 4%-ǵa (0,25 b.p.) deıin kóterýine qaramastan, AQSh-tyń bazalyq mólsherlemeni jaqyn arada kóterýge daıyn ekeni týraly málimdemesinen keıin 3,3% (15,1-den 15,6-ǵa deıin) álsiredi.