Apta ishinde 3 myńnan astam qylmys jasaldy

ASTANA. QazAqparat – Bir apta ishinde respýblıka aýmaǵynda 3 myńnan astam qylmys tirkeldi. Bul týraly QR Іshki ister mınıstrligi baspasóz qyzmetiniń ókili Shuǵyla Turlybek aıtty, dep habarlaıdy QazAqparat tilshisi.

«Bir apta ishinde 3 018 qylmys jasaldy. Onyń 1 914-i táýlik ishinde ashyldy. Polıtsııa qyzmetkerleri «izin sýytpaı» 18 kisi óltirýdi, 4 ólimge ákep soqqan densaýlyqqa qasaqana aýyr zııan keltirýdi, 1 qaraqshylyq, 27 tonaý jáne 440 bóten múlikti urlaý qylmystaryn ashty», - dedi Shuǵyla Turlybek vedomstvonyń baspasóz alańynda ótken brıfıngte.

Sonymen qatar ol ótken aptada Memleket basshysynyń qabyldaýynda bolǵan Іshki ister mınıstri Marat Ahmetjanov eldegi qylmystyq jaǵdaıdyń 10 aıdaǵy jaı-kúıi týraly esep bergenin aıtty.

Mınıstr Prezıdentke bopsalaýǵa, adam saýdasyna, qarý-jaraq, esirtki jáne basqa da qylmystarǵa mamandanǵan 33 uıymdasqan qylmystyq top ustalǵany týraly esep bergen. Polıtseıler zańsyz aınalymnan 12 tonnaǵa jýyq esirtki, onyń ishinde 212 keli sıntetıkalyq esirtki tárkilegenin atap ótken.