«Apple» kontrafaktilik ónimderine qarsy kúres kúsheıedi

<p>ASTANA. KAZINFORM &mdash; 2024 jylǵy 8 qarashada Ádilet vıtse-mınıstri B. Jaqselekovanyń &laquo;Apple&raquo; Europe Ltd kompanııasynyń ókili H. Smıt hanymmen kezdesýi ótti.</p>

Kezdesýdiń maqsaty zııatkerlik menshik quqyqtaryn qorǵaýdyń jáne kontrafaktilik ónimdermen kúrestiń ózekti máselelerin talqylaý boldy.

Botagóz Jaqselekova Ádilet mınıstrliginiń osy saladaǵy keshendi jumysy, onyń ishinde naryqtardy turaqty tekserý jáne quqyq buzýshylyqtardyń jolyn kesý, sondaı-aq mamandardy oqytý jáne biliktiligin arttyrý boıynsha Dúnıejúzilik zııatkerlik menshik uıymymen (DZMU) birlesken jobany iske asyrý týraly aıtyp berdi.

Vıtse-mınıstr sonymen qatar tutynýshylar úshin aqparattyq naýqandar júrgizýdiń jáne «Apple» kompanııasy ónimderiniń túpnusqalyǵyn tekserýdiń tıimdi quraldaryn jasaýdyń mańyzdylyǵyn atap ótti.

Foto: Ádilet mınıstrliginiń basapsóz qyzmeti

Eýropa, Taıaý Shyǵys, Ortalyq Azııa jáne Afrıka elderindegi «Apple» kompanııasynyń keden organdarymen ózara is-qımyly jónindegi baǵyttyń basshysy H. Smıt hanym ádilet organdarynyń kontrafaktige qarsy kúrestegi kúsh-jigerin joǵary baǵalady. Ol aýmaqtyq ádilet organdarynyń qyzmetkerlerine aıtarlyqtaı nátıjelerge qol jetkizgen maqsatty jumystary úshin alǵysyn bildirip, mundaı sharalar quqyq ıeleri men tutynýshylardyń múddelerin qorǵaýǵa yqpal etetinin atap ótti.

Sonymen qatar, H. Smıt hanym kontrafaktini tsıfrlyq ortada, atap aıtqanda elektrondyq saýda alańdarynda taratý sııaqty keıbir ózekti máselelerdi atap ótti. Ol osy salada birlesken jumysty jalǵastyrý qajettigin atap ótip, «Apple» kompanııasynyń basqa elderde jınaqtaǵan oń tájirıbesimen bólisýge daıyn ekenin aıtty.

Ádilet mınıstrligi men «Apple» kompanııasy Qazaqstan Respýblıkasynyń aýmaǵynda quqyq tártibin nyǵaıtý jáne quqyq ıelenýshilerdiń múddelerin qorǵaý sheńberindegi yntymaqtastyqty jalǵastyrýǵa nıetti.

Buǵan deıin Ádilet mınıstrligi el aýmaǵynda Tsıfrlyq sot oryndaýshyny iske qosqany habarlandy.