Apple kompanııasy Siri tyńshylyqtary isi boıynsha sotqa 95 mln dollar tóleıdi

<p>ASTANA. KAZINFORM — Apple kompanııasy Siri daýystyq kómekshisi paıdalanýshynyń qupııalylyǵyn buzdy degen aıyppen toptyq shaǵymdy retteý úshin 95 mln dollar tóleýge kelisti.</p>

Fox Business málimetinshe, Apple ónimderi Siri daýystyq kómekshisin baıqaýsyzda iske qosqannan keıin jeke sóılesýlerdi únemi jazyp alatynyn málimdegen mobıldi qurylǵy ıeleriniń shaǵymy Kalıfornııanyń Oklend shtatyndaǵy federaldy sotyna berildi. 

Sondaı-aq, sotta áńgimelerdiń mazmuny úshinshi tulǵalarǵa, sonyń ishinde keıbir paıdalanýshylardyń sóılesýlerine beıimdelgen jarnama berýshilerge qoljetimdi boldy dep habarlandy. 

Eki talapker «Air Jordan» krossovkalary men «Olive Garden» meıramhanalary týraly áńgimelesý keıinnen olardyń osy brendter týraly maqsatty jarnama alýyna ákelgenin málimdedi. 

Taǵy bir adam dárigermen jeke sóıleskennen keıin fırmalyq hırýrgııalyq emdeý týraly habarlandyrý alǵanyna shaǵymdandy.

95 mln dollarlyq ótemaqy — sońǵy qarjy jylynda shamamen 93,74 mlrd dollar taza kiriske ıe bolǵan Apple kompanııasynyń 9 saǵattyq tabysyna teń.

Forbes málimetinshe, toptyq shaǵymdy Siri qoldaıtyn Apple ónimderiniń ıeleri túsirdi, oǵan 2024 jyldyń 17 qyrkúıegi men 2024 jyldyń 31 jeltoqsany aralyǵynda satyp alynǵan iPhone, iPad, Apple Watch, MacBook, iMac, HomePods, iPod touch jáne Apple TV qurylǵylary jatady.

Apple buǵan deıin 2019 jyldyń tamyz aıynda keshirim surap, Siri baǵdarlamasyn ýaqytsha toqtatqan bolatyn. Kompanııa sapany baqylaý maqsatynda paıdalanýshylardyń sheshimi boıynsha aýdıo jazbalardy saqtamaýmen qosa, ózgerister engizýge ýáde berdi.

2019 jyldyń qazan aıyna qaraı «iOS 13.2» nusqasynyń shyǵarylymymen Apple tutynýshylarǵa Siri tarıhyn joıýǵa jáne aýdıo jazbalarmen bólisýden bas tartýǵa múmkindik beretin parametrlerdi engizdi. 

Advokattar 28,5 mln dollarǵa deıingi gonorar, sondaı-aq sot shyǵyndary úshin 1,1 mln dollar talap etip otyr.

Kalıfornııa shtatyndaǵy San-Hose federaldy sotynda Google daýystyq kómekshisi paıdalanýshylarynyń atynan uqsas sot isi qaralyp otyr. Google isi boıynsha shaǵymdanýshylardy Apple isindegideı zań fırmalary usynǵan.

Tehnologııalyq alpaýyt Amazon da óziniń daýystyq qyzmetine qatysty osyndaı aıyptaýlarǵa tap boldy.

Eske salsaq, buǵan deıin Google, Apple, Netflix syndy sheteldik kompanııalar Qazaqstanǵa 70 mlrd teńge salyq tólegenin jazdyq.