Apellıatsııa soty Bolat Nazarbaev isine shyqqan úkimdi ózgerissiz qaldyrdy

QONAEV. QazAqparat – Bolat Nazarbaev Almaty oblysy Qarasaı aýdandyq sotynyń 17 sáýirdegi sheshimine apellıatsııalyq shaǵym túsirdi. Sot sheshiminde aýmaǵy 37,6 gektar jer telimin satyp alý-satý sharty («Barys» avtobazary) jaramsyz dep tanylǵan edi, dep habarlaıdy QazAqparat oblystyq sottyń saıtyna silteme jasap.

Keshe azamattyq ister jónindegi apellıatsııalyq sot alqasy jaýapkerdiń Qarasaı aýdandyq sotynyń 17 sáýirdegi sheshimine bergen apellıatsııalyq shaǵymy boıynsha azamattyq isin qarady.

«Qarasaı aýdanynyń prokýratýrasy memlekettik mekemeler men N. esimdi azamatqa qatysty talap-aryzben sotqa júgindi. Bul rette jer telimderin satyp alý-satý sharttaryn jaramsyz dep taný, jer ýchaskelerine menshik quqyǵy týraly memlekettik aktilerdi jaramsyz dep taný jáne jer ýchaskelerine menshik quqyǵyn memlekettik tirkeýdiń kúshin joıý talaby qoıylǵan edi. Sot barysynda atalǵan adamǵa aýyl sharýashylyǵy maqsatyndaǵy jerlerge qatysty ýchaskeleri berilgen kezde, oblystyq aýmaqtyq organ men jer resýrstaryn basqarý jónindegi ortalyq ýákiletti organnyń kelisimi bolmaǵany anyqtaldy», - delingen oblystyq sot málimetinde.

Sýarmaly egistik jerlerdi sýarylmaıtyn jer túrine aýystyrý týraly túpkilikti sheshim qabyldaý oblystyq atqarýshy organnyń quzyretine jatady.

Sondyqtan aýdan ákiminiń 2014 jyly jer ýchaskelerine qatysty ýaqytsha paıdalaný (jalǵa alý) quqyǵyn berý týraly qaýlysy aýdan ákimine belgilengen quzyretti buza otyryp shyǵarylǵan.

«Qarasaı aýdandyq sotynyń 17 sáýirdegi úkimimen prokýrordyń atalǵan sharttardy jaramsyz dep taný jáne jer ýchaskeleri boıynsha menshik quqyǵyn memlekettik tirkeýdiń kúshin joıý týraly talap-aryzy ishinara qanaǵattandyryldy. Bul turǵyda sot sheshimimen kelispegen jaýapker apellıatsııalyq shaǵym túsirdi. Azamattyq ister jónindegi apellıatsııalyq alqa birinshi satydaǵy sottyń sheshimin zańdy dep tanyp, qaýlyny ózgerissiz qaldyrdy», - dep atalyp ótken Almaty oblystyq sotynyń málimetinde.