«Apatty sý nysandary týraly málimet nege ala-qula?» - respýblıkalyq basylymdarǵa sholý
***
«Jer kindigi - Baıqońyr. Kún senbi. Saǵat tańǵy besti soǵyp tur. Aldymen boıy báıterekteı bolǵan temir qursaý báısheshek sekildi ashyla bastady. Qaýyzyn jarǵan gúldeı jaıylyp shyǵa keldi. Álden ýaqytta jalyndaǵan ot kórindi. Sonan soń jer-dúnıeni silkindirip gúrs etken daýys shyqty. Tabanymyzdyń asty dirildep ketti. Joǵaryǵa qoıylǵan radıoqabyldaǵyshtan: «QazSat-2» ǵaryshqa attandy», degen daýys shyqty. Bul ýaqytta saǵat tili tańǵy 5.15-ti kórsetip tur edi»,- dep jazady «Egemen Qazaqstan» gazeti búgingi sanyndaǵy «Qaryshta, ǵaryshqa!» degen taqyryptaǵy maqalasynda. Spýtnıktik-televızııalyq aqparat taratýǵa arnalǵan elimizdiń ekinshi jasandy jer serigi jaıynda tolyq maǵlumat alǵyńyz kelse basylymnyń búgingi nómirin jiberip almańyz.
«Egemen Qazaqstan» gazetiniń jazýynsha osydan úsh jyl buryn Astanaǵa aýysyp, odan keıin Almatyǵa qaıta oralǵan halyqaralyq «Eýrazııa» kınofestıvali bıyl jetinshi ret 19-24 qyrkúıek aralyǵynda ótpek. Bul festıvalǵa usynylatyn fılmder qazaq kınematografııasynyń sońǵy jetistikterin beınelemek. Elimizde tek bıylǵy jyly 27 fılm túsirilgen bolsa, onyń 12-si osy baıqaýǵa joldama alady dep kútilýde. Baıqaýǵa usynylǵan týyndylar jaıynda basylymdaǵy «Eýrazııa-2011» kınofestıvali osy kúreń kúzde ótedi» degen taqyryptan bile alasyzdar.
***
«Aıqyn» gazetiniń «Minber» aıdarynda tehnıka ǵylymdarynyń doktory Ádilǵazy Bektibaevpen aradaǵy suhbat «Jer qoınaýyndaǵy paıdaly qazylymdardy ıgerýde ata-babamyzdyń úlesi úlken» degen taqyryppen berilgen. Basylymnyń barlyq saýaldaryna egjeı-tegjeıli jaýap bergen ǵalym: «Qazirgi kúnde elimizdiń birsypyra ken oryndary sheteldikterdiń ýaqytsha basqarýyna berildi.Olar elimizdiń damýyna ózindik úlesterin qosýda. Tek jer qoınaýyndaǵy paıdaly qazylymdar halyq múddesine saı qamqorlyqpen qazylyp alynyp jatsa, elimiz úshin úlken paıda», - deıdi.
«Qarajambasmunaı» AQ jáne «Ózenmunaıgaz» AQ óndiristik fılıaly ujymdarynda mamyr aıynda bastalǵan ereýilder 2008 jyly Jańaózen qalasynda ótken narazylyq sharalarynyń kezekti jalǵasyndaı kórinedi. Ómir súrý deńgeıi boıynsha Qazaqstannyń eń joǵary oblystarynyń biri sanalatyn aımaqta ótip jatqan bul áleýmettik narazylyq kóptegen suraqtar týyndatyp otyr. Bul jerde jalaqy men áleýmettik jeńildikterdiń deńgeıi óte joǵary ekeni barshaǵa málim. Sondyqtan da el turǵyndarynyń kópshiligi bir nárseni túsingisi keledi: munaıshylar nege ereýildep jatyr? Óz basshylarymen qaı nársede kelise almaı otyr? Uzaqqa sozylǵan tártipsizdikke kásiporyn ákimshiligi qalaı qaraıdy? Mine osy saýaldarǵa «Aıqyn» gazetindegi «Narazylyqtardyń negizi tártip pen jaýapkershiliktiń joqtyǵynda» degen maqaladan jaýap alasyz.
***
«Keshe Tótenshe jaǵdaılar mınıstrliginde oqys jaǵdaılardy eskertý men onyń aldyn alý boıynsha vedomstvoaralyq komıssııanyń kezekti otyrysy bolyp ótti. Kún tártibinde gıdrotehnıkalyq nysandardyń qaýipsizdigin arttyrýǵa qatysty máseleler talqyǵa tústi», - dep jazady «Alash aınasy» gazeti «Apatty sý nysandary týraly málimet nege ala-qula?» degen maqalasynda. Basylymnyń atap ótýinshe, Qazaqstannyń aýmaǵynda gıdrotehnıkalyq nysandardyń mańynda ám ondaı nysannyń sý basý qaýpi joǵary bolatyn aımaqtarynda 1,5 mıllıonǵa tarta adam turyp jatyr eken. Demek óńirde ǵana emes, búkil álemde aıtarlyqtaı sezilip jatqan klımattyq ózgerister tótensheniń mınıstrligine qyraǵylyqty aıryqsha talap etetini anyq.
«Alash aınasy» gazetiniń turaqty «Dat!» aıdarynda Qazaqstannyń Ózbekstan Respýblıkasyndaǵy Tótenshe jáne Ókiletti Elshisi Bóribaı Jeksembınmen aradaǵy suhbat jaryq kórdi. Basylym tilshisiniń barlyq saýaldaryna tuşymdy jaýap bergen ol: «Ústimizdegi jyly kórshiles jatqan eki el óz Táýelsizdikteriniń 20 jyldyǵyn atap ótýge úlken daıyndyq jumystaryn júrgizip jatyr. Osy oraıly sátti paıdalana otyryp, Qazaqstan men Ózbekstan halyqtaryna dostyqtary máńgi jarasqan, Ortalyq Azııadaǵy yntymaqtastyq pen syılastyqtyń jarqyn úlgisin kórsetetin elder bolsyn dep tileımin», - deıdi. Ekeýara áńgime «Men Qazaqstan-Ózbekstan shekarasy dostyq pen yntymaqtastyqtyń dáleli bolyp qalatynyna senemin» degen taqyryppen berilgen.
***
«Premer-Mınıstr Kárim Másimov keshe Respýblıkalyq bıýdjettik komıssııanyń 23 otyrysyn ótkizdi», - dep jazady «Kazahstanskaıa pravda» gazeti. Basylymnyń atap ótýinshe, onda memlekettik organdardyń 2011-2015 jyldarǵa arnalǵan strategııalyq josparlaryna ózgerister men tolyqtyrýlar engizý boıynsha jobalar, respýblıkalyq bıýdjettik baǵdarlamalar ákimshileriniń 2012-2014 jyldarǵa arnalǵan bıýdjettik ótinimderi, sondaı-aq respýblıkalyq jáne jergilikti bıýdjetterdiń kiristerin qysqartýdy nemese shyǵystaryn ulǵaıtýdy kózdeıtin normatıvtik quqyqtyq aktiler saraptamasynyń nátıjesi boıynsha materıaldar qaraldy.