Apatty úı: Membaǵdarlama arqyly qurylys júrgizgen kompanııa basshylary sotta jaýap beredi
№ 2 Aqtóbe qalalyq sotynda «Mashat» JShS-niń basshysy F.Janpeıisov, «Agro-Servıs» JShS basshysynyń orynbasary S. Aıapbergenovke qatysty Qylmystyq kodekstiń «Sapasyz salynǵan qurylys», «Alaıaqtyq» baptary jáne tehnıkalyq baqylaýyshylar J.Kenjebaev, R.Dosovqa qatysty «Alaıaqtyq», «Saraptamalyq jumystardy nemese ınjınırıngtik qyzmetter kórsetýdi tıisinshe oryndamaý» baptary boıynsha is qaraldy.
Іs materıalyna súıensek, F.Janpeıisov 2017 jyly tanysynyń inisi S. Aıapbergenovke turǵyn úı salý usynysyn tastaıdy. Olar tórt qabatty eki úı salýǵa kelisedi.
Keıin «Ótes Aqtóbe» JShS-niń basshysy ári tehnıkalyq baqylaý ınjeneri J.Kenjebaev, «Master Metall Plast» JShS-niń tehnıkalyq baqylaý ınjeneri R.Dosovpen kelisimge keledi.
2018 jyly Aqtóbe qalalyq qurylys bólimi Memlekettik satyp alý portalyna 24 páterli eki úıdiń habarlamasyn shyǵarady. Ár kópqabatty úı qurylysyna 168,7 mln teńgeden astam qarjy usynylady.
Sol jyly naýryz aıynda «Mashat» JShS-i jeńimpaz dep tanylyp, Aqtóbe qalasy Almaty aýdany Qarǵaly turǵyn alabyndaǵy № 39 «K», № 40 «K» úılerin salýǵa 337 mln 465 myń teńgeden astam qarjy qarastyryldy.
2018 jyldyń aqpan aıyndaǵy kelisim boıynsha «Master Metall Plast» JShS basshysy A.Jeńsikbaevtiń buıryǵymen tehnıkalyq baqylaý R.Dosovqa júkteldi.
Sonymen birge «Ótes Aqtóbe» JShS-niń basshysy J.Kenjebaev óz-ózin tehnıkalyq baqylaýshy dep tanydy.
Keıin qurylys jumystary júrgizilip, kópqabatty úıdiń irgetasy qalandy. Dál osy tusta jobalyq-smetalyq qujatta kórsetilgen talap saqtalmaǵan. 2019 jyldyń qyrkúıeginde jáne qazan aıynda tapsyrys berýshi eki úıdi de qabyldap alady.
Turǵyn úı Aqtóbe qalalyq turǵyn úı qatynastary bólimine ótip, «Nurly jer» baǵdarlamasy aıasynda Otbasy bank arqyly kezekte turǵan aqtóbelikterge berildi.
Al 2023 jyldyń kókteminde № 39 «K» jáne № 40 «K» úıiniń turǵyndary irgetas bloktary arasynda jaryqtyń paıda bolǵanyn, kúnnen kúnge ulǵaıyp ketkenin aıtyp, dabyl qaqty.
Úıdiń turǵyndary ózge jerge kóshirilip, Ulttyq saraptama jáne sertıfıkattaý ortalyǵynyń oblystyq fılıaly irgetasyndaǵy bloktarda arnaıy markilengen jazba joq ekenin, talapqa saı kelmeıtinin anyqtady. Tipti betondaǵy qıyrshyq tastyń ólshemi de durys emes bolyp shyqty.
Saraptama ortalyǵy úıdiń kez kelgen sátte qulap qalatynyn, adam ómirine qaýipti ekenin aıtyp, qorytyndy shyǵardy.
Qazirgi kezde memleketke kelgen shyǵyn 337 465 676,80 teńge jáne turǵyndarǵa kelgen shyǵyn 291 620 025 teńge dep esepteledi.
Búgingi sot otyrysynda osy úıdiń turǵyndary jaýap berdi. Jábirlenýshilerdiń bári de jańa páterge qonystanǵan.
Olar alǵan jańa páter aýdany burynǵysynan birneshe sharshy metrge úlken bolyp, nesıemen qatar qosymsha aqy tólep otyr.
Olar sol aralyqtaǵy shyǵyndy merdigerler ótegenin qalaıdy.
— Ol úıde 2021 jyldyń qyrkúıeginen bastap turdym. Páterdi 8,6 mln teńgege satyp aldym. Joǵary qabattarda baıqalmaǵanymen, jertólege komıssııamen birge kirip qaradyq. Ol kezde arnaıy japsyrylǵan qaǵazdary jyrtylyp jatty. 1 bólmeli páterdiń ornyna páter berdi. Alaıda onyń sharshy metri kóp. Men ústine taǵy 780 myń teńge tólep otyrmyn. Osy ústeme aqshany tólesin dep talap qoıamyn, — dedi jábirlenýshi Aqmurzaev.
Sot otyrysy jalǵasyp jatyr.