Apatqa ushyraǵan ushaqtyń ushý jaramdylyǵy mamyrda uzartylǵan

ALMATY. QazAqparat – Almatyda ótken brıfıng barysynda QR Premer mınıstriniń orynbasary Roman Sklıar apatqa ushyraǵan ushaqtyń tehnıkalyq sıpatyn aıtyp berdi, dep habarlaıdy QazAqparat tilshisi.

«Ushaq 1996 jyly shyqqan. Ushý jaramdylyǵy týraly sertıfıkaty men kýáligi bıyl mamyr aıynda uzartylǵan. Bul áýe kemesi qazaqstandyq reestrde 2016 jyly 26 tamyzda tirkelgen. Barlyǵy Bek Air kompanııasynda 10 áýe kemesi bar. Olardyń 9-ynda ushý jaramdylyǵy sertıfıkaty bar. QR Avıatsııa komıteti Bek Air kompanııasynyń jumysyn ýaqytsha toqtatty», - dedi Roman Sklıar.

Aıta keteıik, búgin tańda Almatydan Nur-Sultan qalasyna ushyp shyqqan ushaq radardan joǵalyp ketti.

Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty. Osy apatqa qatysty shuǵyl jeli iske qosylǵan.

QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi. Elbasy Nur-Sultan Nazarbaev jolaýshylar ushaǵynyń apatqa ushyraýyna baılanysty kóńil aıtty.

Foto: www.emer.gov.kz