Apatqa ushyraǵan «Soıýz-FG» bólshekteri Samaraǵa jetkiziledi

ASTANA. QazAqparat - 2018 jylǵy 14 qazanda osy aptanyń ortasynda apatqa ushyraǵan «Soıýz-FG» zymyrantasyǵyshynyń bólshekteri samaralyq «Progress» kásipornyna jetkiziledi. Bul týraly Roskosmos baspasóz qyzmetinen málim boldy, dep habarlaıdy QazAqparat.

Aldaǵy aptanyń basynda «Progress» zymyran-ǵarysh ortalyǵynda ushyrý synaqtary jónindegi komıssııa jumysqa kirisedi. Olar qorytyndy shyǵarý úshin apatty zymyrantasyǵyshtyń bólshekterin zertteýmen aınalysady.

Budan buryn habarlanǵandaı, 12 qazanda Jezqazǵan qalasynda ornalasqan №1 Reseı bazasynyń jáne quraldarynyń kúshimen ǵarysh kemesiniń baspaldaqtary tabyldy.

  Birinshi, ekinshi, úshinshi baspaldaq, sonymen qatar apattyq qutqarý júıesiniń  qozǵaltqysh qurylǵysy Qaraǵandy oblysy Ulytaý aýdany Talap aýylynan 40 shaqyrym jerden anyqtaldy.

Atalǵan aýmaqtan zymyran bólshekteri tolyqtaı shyǵarylǵannan keıin, «Ǵarysh-Ekologııa» ǵylymı-zertteý ortalyǵynyń mamandary topyraq pen aýa synamalaryn zertteý jumystaryna kirisedi.

Esterińizge sala keteıik, 11 qazanda 14 saǵat 40 mınýt 15 sekýndta Baıqońyr ǵarysh aılaǵynyń Gagarın start alańynan orbıtaǵa basqarylatyn kóliktik «Soıýz MS-10» kemesin alyp shyǵýy tıis «Soıýz FG» zymyrantasyǵyshy ushyryldy. Biraq start berilgen soń birneshe mınýttan keıin Roskosmos saıtyndaǵy tikeleı kórsetilim úzilip, dıktor «zymyrantasyǵyshtyń apatqa ushyraǵanyn» habarlaǵan edi.