AÓSShK-ti damytýdyń aldaǵy perspektıvalary belgilendi

NUR-SULTAN. QazAqparat – Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Azııadaǵy ózara is-qımyl jáne senim sharalary keńesi (AÓSShK) Hatshylyǵynyń Atqarýshy dırektory Qaırat Sarybaıdy qabyldady, dep habarlaıdy QazAqparat QR SІM baspasóz qyzmetine silteme jasap.

Kelissózder barysynda 2021 jylǵy qazanda Nur-Sultan qalasynda ótetin AÓSShK Syrtqy ister mınıstrleriniń 6-shy kezdesýine daıyndyq máseleleri talqylandy.

M.Tileýberdi AÓSShK ınstıtýtsıonaldyq transformatsııasy boıynsha dáıekti jumysty jalǵastyrý qajettigin atap ótti. Sondaı-aq, ol aldaǵy mınıstrlik kezdesý barysynda óńirdegi jáne álemdegi ózgerip otyrǵan geosaıası ahýal jaǵdaıynda erekshe ózekti bolyp tabylatyn AÓSShK senim sharalarynyń jańartylǵan katalogyn qabyldaýdyń mańyzdylyǵyna nazar aýdardy.

Óz kezeginde, Q.Sarybaı QR-dyń AÓSShK-ke tóraǵalyq etý tujyrymdamasyn iske asyrý barysy jáne 2022 jyly Keńestiń 30-jyldyǵy sheńberinde josparlanyp otyrǵan is-sharalar týraly habardar etti.

Qazaqstandyq tóraǵalyqtyń bastamalaryn ımplementatsııalaý arqyly AÓSShK-tiń álemdik arenada tanylý deńgeıiniń artýy atap ótildi.

AÓSShK Azııadaǵy beıbitshilikti, qaýipsizdik pen turaqtylyqty qamtamasyz etýge baǵyttalǵan yntymaqtastyqty nyǵaıtý jónindegi halyqaralyq forým. Búgingi tańda 27 memleket Keńes múshesi, al 8 el men 5 halyqaralyq uıym baqylaýshy retinde qatysady. AÓSShK hatshylyǵy Nur-Sultan qalasynda ornalasqan.