Onyń aıtýynsha, áriptesterimen birge úsh saılaý ýchaskesinde bolyp, daýys berý protsesin baqylaǵan. Elshi ýchaskelerdegi jalpy ahýaldyń jaqsy uıymdastyrylǵanyn atap ótti.
- Biz barǵan ýchaskelerde daýys berý protsesi jaqsy deńgeıde uıymdastyrylǵan. Azamattar óz daýystaryn berip, ýchaskelerden tynysh ári tártippen shyǵyp jatty, – dedi Ismat Djahan.
Sondaı-aq ol daýys berýge kelgen azamattardyń belsendiligine nazar aýdardy. Onyń sózinshe, keıbir otbasylar daýys berýge balalarymen birge kelgen.
- Tipti kishkentaı balalardyń da ata-analarymen birge kelgenin kórdik. Bul jas urpaqqa saıası quqyqtardy júzege asyrýdyń mańyzyn kórsetedi, – dedi ol.
Elshi referendýmdy uıymdastyrýǵa jaýapty komıssııanyń jumysyna joǵary baǵa berdi. Onyń aıtýynsha, daýys berý ýchaskelerinde múmkindigi shekteýli azamattarǵa da qajetti jaǵdaı jasalǵan.
- Biz barǵan úsh ýchaskeniń árqaısynda birneshe daýys berý kabınasynyń biri múmkindigi shekteýli jandarǵa arnalǵan. Bul – óte mańyzdy, – dep atap ótti Ismat Djahan.
Sonymen qatar ol halyqaralyq baıqaýshylardy shaqyrǵany úshin Qazaqstan bıligine alǵys bildirdi.
- Jalpy áserim óte jaqsy. Bizdi baıqaýshy retinde shaqyryp, jaǵdaımen tanysýǵa múmkindik bergeni úshin tıisti organdarǵa alǵys aıtamyn, – dedi elshi.
Buǵan deıin ázerbaıjandyq saıasattanýshy Zaýr Mamedovtiń paıymynsha, Qazaqstanda 15 naýryzda ótetin referendým eldiń saıası evolıýtsııasynyń kelesi mańyzdy kezeńi ári memlekettik basqarý júıesin jańǵyrtý baǵytynyń zańdy jalǵasy sanalady.