AÓSShK sammıtine daıyndyq qalaı júrip jatyr

ASTANA. QazAqparat – Azııadaǵy ózara yqpaldastyq jáne senim sharalary jónindegi keńeske múshe memleketter 12-13 qazanda Qazaqstan astanasynda ótetin sammıttiń keń kún tártibin maquldady. Bul týraly AÓSShK hatshylyǵynyń atqarýshy dırektory Qaırat Sarybaı aıtty, dep habarlaıdy QazAqparat tilshisi.

Qaırat Sarybaı AÓSShK 30 jyldyq mereıtoıyna arnalǵan saltanatty sharada aldaǵy sammıtke daıyndyq qalaı júrip jatyr degen suraqqa jaýap berdi.

«Sammıtke daıyndyq óte belsendi júrip jatyr. Qazaqstan Prezıdenti Qasym-Jomart Toqaev sammıt mazmundy bolýy úshin jáne uıymdastyrýshylyq aspektileri eń joǵary deńgeıde bolýy úshin barlyq memlekettik organdar men hatshylyqqa tıisti tapsyrma berdi. Hatshylyqqa kelsek, keńeske múshe memleketter aldaǵy sammıttiń óte aýqymdy kún tártibin maquldaǵanyn qýanyshpen habarlaımyn. Bul sammıt belgili bir dárejede tarıhı oqıǵa bolady dep oılaımyn. Bolashaqqa boljam jasamaımyn, biraq qandaı da bir rekordtar ornatýymyz múmkin», - dedi Q. Sarybaı tilshilerge bergen suhbatynda.

Onyń aıtýynsha, AÓSShK-niń basty mindeti – múshe memleketter arasyndaǵy senimdi nyǵaıtý.

«AÓSShK óz ınstrýmentarııin jańartýy tıis dep sanaımyn. Búgingi tańda Senim sharalarynyń jańartylǵan katalogi bar. Ony AÓSShK syrtqy ister mınıstrleri ótken jyly jańartty. Qazirgi jaǵdaıdy eskere otyryp, aıtarlyqtaı jańa elementter, ınnovatsııalar engizildi», - dep atap ótti Q. Sarybaı.

Eske salsaq, 7 qyrkúıekte Qazaqstan Prezıdenti Qasym-Jomart Toqaev AÓSShK Hatshylyǵynyń atqarýshy dırektoryn qabyldady. Memleket basshysyna AÓSShK-ny tolyqqandy halyqaralyq uıymǵa aınaldyrý josparlary týraly aqparat usynyldy.

Aıta keteıik, AÓSShK VI sammıti 12-13 qazan kúnderi Qazaqstan astanasynda ótedi.