AÓSShK óńirdegi turaqtylyqty qamtamasyz etýdi ózine mindet etip otyr – sarapshy

ASTANA. QazAqparat – Azııadaǵy ózara is-qımyl jáne senim sharalary jónindegi keńes aıasyndaǵy yntymaqtastyqty nyǵaıtýǵa baǵyttalǵan sharalar tolyq aýqymda júzege asýy tıis. Bundaı pikirdi «Rýhanı jańǵyrý» Qazaqstan qoǵamdyq damý ınstıtýty strategııalyq taldaý tobynyń basshysy Lázzat Nurqatova bildirdi, dep habarlaıdy QazAqparat.

«Astanada ótken Azııadaǵy ózara is-qımyl jáne senim sharalary jónindegi keńestiń aýqymy keńeıe tústi. Bul sammıt jumysyna 11 eldiń basshylary qatysty. Azııa qurlyǵyndaǵy memleketterdi biriktiretin bedeldi halyqaralyq forým óńirdegi turaqtylyq pen qaýipsizdikti qamtamasyz etý maqsatynda Azııa jáne Eýropa elderiniń ózara qarym-qatynasy men yntymaqtastyǵynyń nyǵaıýyn mańyzdy mindet retinde qarastyrady. Aıta keterligi, AÓSShK múshe-memleketteriniń kelise otyryp aıqyndaǵan sharalary tolyq kólemdi, jaýapty túrde iske assa, sol mindettiń de durys atqarylǵany kórinis tabar edi», - deıdi Lázzat Nurqatova.

Sarapshynyń pikirinshe, Astanada bundaı aýqymdy is-sharany ótkizý ońaı sharýa emes.

Munyń ózi Qazaqstanǵa jáne onyń qazirgi Prezıdenti Qasym-Jomart Toqaevtyń syrtqy saıasattaǵy is-áreketterine halyqaralyq qaýymdastyq tarapynan joǵary senim artylatynyn bildiredi.