AÓSShK-niń Aǵa laýazymdy tulǵalar komıteti 2023 jylǵy qorytyndy otyrysyn ótkizdi

<p>Azııadaǵy ózara is-qımyl jáne senim sharalary keńesiniń (AÓSShK nemese Azııa Keńesi) Aǵa laýazymdy tulǵalar komıtetiniń qatysýshylary Azııa keńesiniń 2023 jylǵy jetistikterin qorytyndylaý jáne uıymnyń aldaǵy qyzmetin talqylaý maqsatynda 2023 jylǵy 12 jeltoqsanda Astanada otyrys ótkizdi, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

AÓSShK-ge múshe memleketterdiń, uıymǵa tóraǵalyq etip otyrǵan Qazaqstan tarapynyń jáne AÓSShK Hatshylyǵynyń joǵary laýazymdy ókilderi osy jyldyń negizgi qorytyndylaryna sholý jasady. Sondaı-aq 2024 jylǵa arnalǵan josparlar men AÓSShK negizgi salalaryndaǵy yntymaqtastyq jónindegi tujyrymdamalardy bekitti. Buǵan qosa baqylaýshy memleket mártebesin alýǵa túsken ótinimdi qarap, basqa halyqaralyq uıymdarmen bolashaqtaǵy yntymaqtastyq jaıyn talqylady. 

Aǵa laýazymdy tulǵalar komıteti otyrysynyń tóraǵasy, Qazaqstan Syrtqy ister mınıstriniń orynbasary Álibek Baqaev múshe memleketterdi 2023 jylǵy eleýli jetistikter, AÓSShK-niń aǵymdaǵy qyzmeti jáne 2024 jylǵa arnalǵan jumys josparlary, onyń ishinde transformatsııa jol kartasyn iske asyrý týraly habardar etti. Jol kartasyn 2023 jylǵy qyrkúıekte AÓSShK Mınıstrler Keńesi maquldaǵan bolatyn. 

AÓSShK Bas hatshysy Qaırat Sarybaı 2023 jyly AÓSShK Hatshylyǵynyń qyzmeti týraly Hatshylyqtyń ótip bara jatqan jyldaǵy jumysynyń barlyq baǵytyn qamtıtyn jyl saıynǵy baıandamasyn usyndy. Sondaı-aq 2024 jylǵa arnalǵan josparmen tanystyrdy. 

Aǵa laýazymdy tulǵalar komıteti senim sharalaryn iske asyrý jónindegi jospardy jáne uıymnyń jyldyq josparlaýynyń negizgi qujattary sanalatyn AÓSShK Hatshylyǵynyń 2024 jylǵa arnalǵan bıýdjetin bekitti. 

Foto: Kazinform

Sonymen qatar Aǵa laýazymdy tulǵalar komıteti Mońǵolııa men Iran daıyndaǵan AÓSShK-niń «Qorshaǵan ortany qorǵaý» jáne «Tabıǵı apattarǵa qarsy kúres» basym salalary boıynsha tujyrymdamalardyń eki jobasyn qarap, maquldady. 

Aıta ketý kerek, Aǵa laýazymdy tulǵalar komıteti Saýd Arabııasy Koroldiginiń AÓSShK-ǵa baqylaýshy memleket retinde qosylý týraly ótinishin qarady jáne AÓSShK Mınıstrler Keńesine Saýd Arabııasyna AÓSShK baqylaýshysy mártebesin berýdi usyndy. AÓSShK qatarynyń keńeıýi jaǵymdy oqıǵa sanalady. Saýd Arabııasynyń AÓSShK qataryna kirýi dıalog pen yntymaqtastyq úshin panazııalyq uıym retinde AÓSShK-ny odan ári damytý turǵysynan mańyzdy. 

Otyrystyń negizgi sátteriniń biri jaqynda Bangladeshtiń ratıfıkatsııalaý nátıjesinde artyqshylyqtar men ımmýnıtetter týraly AÓSShK Konventsııasynyń kúshine ený úderisindegi ilgerileý boldy. 

Sonymen qatar Aǵa laýazymdy tulǵalar komıteti qatysýshylary búkil Azııa qurlyǵyna paıda ákeletin osy qurylymdar arasynda tıimdi sınergııa qurý úshin Shanhaı yntymaqtastyq uıymy (ShUU), Ońtústik-Shyǵys Azııa memleketteriniń qaýymdastyǵy (OShAMQ) jáne BUU Terrorızmge qarsy basqarmasy sııaqty basqa halyqaralyq uıymdarmen tyǵyz qarym-qatynas ornatý, atalǵan qurylymdarmen tıimdi ózara is-qımyldy odan ári damytý máselesin talqylady.