AÓSShK halyqaralyq uıymǵa aınalsa, ataýy ózgerýi múmkin

ASTANA. QazAqparat – Azııadaǵy ózara is-qımyl jáne senim sharalary jónindegi keńestiń bas hatshysy Qaırat Sarybaı keńes halyqaralyq uıymǵa aınalsa, aty ózgerýi múmkin ekenin málim etti, dep habarlaıdy QazAqparat tilshisi.

«Uıym bolady degenge eshkimniń kúmáni joq. Múshe memleketterdiń bári soǵan bel býyp, málimdemege qol qoıdy. Biraq ol uıymnyń ataýy qalaı bolady? Mysaly, Birikken Ulttar Uıymynda biz baqylaýshy mártebesindemiz. Al AÓSShK aıasynda áriptestiktiń jańa bir basqa tetigi ornatylatyn shyǵar. Osynyń bári uıymdardyń arasyndaǵy aıyrmashylyqty meńzeıdi. Eń bastysy, bári transformatsııaǵa qýanyp otyr. Bul – bir. Ekinshisi – aramyzdaǵy yntymaqtastyqtyń jańa deńgeıge kóshý kerektigin bári moıyndap otyr», - deıdi Qaırat Sarybaı.

Ol keńes halyqaralyq uıymǵa aınalyp jatsa, ataýy qalaı ózgergenin jón kóretinin ortaǵa saldy.

«Men tek jeke pikirimdi aıta alamyn. Eshkimniń atynan aıta almaımyn. Maǵan salsa, qazirgi ataýyn qaldyrǵan durys. Óıtkeni ábden qalyptasyp boldy jáne bári osy ataýymen tanyp-biledi. Sondyqtan ataýyn qarastyrý protsesi alda kútip tur», - dedi AÓSShK bas hatshysy.