AÓSShK-ge múshe memleketter arasynda «jasyl dálizder» ashýymyz qajet – QR Prezıdenti

ASTANA. QazAqparat – Azııa álemdegi aýyl sharýashylyǵy ónimderiniń úshten birin óndirgenimen, bul saladaǵy olqylyqtardan áli de tolyq aryla qoıǵan joq. Bul týraly Astanadaǵy Azııadaǵy ózara is-qımyl jáne senim sharalary keńesiniń sammıtinde Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«AÓSShK keńistiginde shyn máninde jumys isteıtin azyq-túlik qaýipsizdigin qamtamasyz etetin mehanızm qajet. Azııa álemdegi aýyl sharýashylyǵy ónimderiniń úshten birin óndirgenimen, bul saladaǵy olqylyqtardan áli de tolyq aryla qoıǵan joq. Biz mańyzdy ónimderdiń ulttyq standarttarǵa sáıkestigin baǵalaýdyń biryńǵaı tásilderin ázirleýimiz kerek. Sondaı-aq taýarlardyń bul sanaty úshin AÓSShK-ge múshe memleketter arasynda «jasyl dálizder» ashýymyz qajet», - dedi Qasym-Jomart Toqaev.

Memleket basshysynyń paıymynsha, shtab-páteri Astanada ornalasqan azyq-túlik qaýipsizdigi jónindegi Islam uıymymen AÓSShK arasyndaǵy yntymaqtastyqty jolǵa qoıý perspektıvti bolmaq.

«Sonymen qatar elderimizdiń aýyl sharýashylyǵy áleýetin eskere otyryp, biz muqtaj elderdi azyq-túlikpen jáne tyńaıtqyshtarmen qamtamasyz etý úshin sharalar qabyldaı alar edik»,- dedi Prezıdent.