AÓSShK-ge múshe elder qarjy salasyndaǵy yntymaqtastyqty nyǵaıta túspek
«Qarjy sammıtin ınstıtýttandyrý jónindegi bastamany Qazaqstan Respýblıkasynyń Prezıdenti Qasym-Jomart Toqaev 2022 jyly AÓSShK-niń altynshy sammıtinde jarııalady. Bul bastama keńeske múshe memleketterdiń AÓSShK sheńberinde qarjy salasyndaǵy ózara yntymaqtastyqty nyǵaıtýǵa qyzyǵýshylyqtyń ósip kele jatqanyn kórsetedi. Buǵan deıin Qytaı AÓSShK-ge tóraǵalyq etý kezeńinde qarjy sammıtin ótkizýdi usyndy jáne búgingideı úsh sammıtti sátti uıymdastyrdy», - dedi Azııadaǵy ózara is-qımyl jáne senim sharalary jónindegi keńesi Bas hatshysynyń orynbasary Chjan Lın.
Sondaı-aq sheteldik meıman «Astana Finance Days 2024» halyqaralyq konferentsııasy aıasynda Azııadaǵy ekonomıkalyq jáne qarjylyq baılanystardy nyǵaıtý taqyrybynda ótken paneldik sessııanyń maqsatyna toqtaldy.
«Búgingi paneldik sessııanyń maqsaty – qarjy sammıti erejesiniń jobasyn talqylaý. Osydan keıin qarjy sammıtin ınstıtýttandyrý máselesin resmı talqylaý bastalady. Bastamanyń maqsaty -ashyq jáne ınklıýzıvti dıalog qurý jáne AÓSShK-ge múshe memleketter arasyndaǵy qarjy salasyndaǵy áriptestikti damytý, óıtkeni álem tez ózgerýde. Eshbir el bul jahandyq syn-qaterdi jalǵyz sheshe almaıdy. Bizge memlekettik organdardyń, salalyq qurylymdardyń sonymen qatar qoǵamdyq uıymdardyń kúsh-jigerin biriktirý úshin alań qajet», - deıdi ol.
Onyń paıymdaýynsha, AÓSShK sheńberindegi qarjy sammıti turaqty organ bola otyryp, búkil Azııa kontıngenti, múmkin, búkil álem úshin qarjylyq ózara is-qımyl salasynda praktıkalyq nátıjeler ákelýi múmkin.
Aıta keteıik, Astanada jyl saıynǵy dástúrli «Astana Finance Days 2024» konferentsııasy «Innovatsııa. Investıtsııa. Serpin» taqyrybynda ótti. Bıylǵy basqosýda qarjy sektoryndaǵy ozyq tehnologııalar, Qazaqstannyń ınvestıtsııalyq múmkindikteri jáne qarjynyń ornyqty damýǵa jáne qoǵamdaǵy oń ózgeristerge áseri talqylandy.