AÓSShK elderiniń ekologııa mınıstrleri Astana málimdemesin qabyldady
Shara beınekonferentsııa rejıminde uıymdastyrylǵan. Keńeske múshe memleketterdiń mınıstrleri men vıtse-mınıstrleri kezek-kezek sóz alyp, óz elderinde ekologııalyq problemalardy sheshý jáne aldyn alý baǵytynda atqarylǵan jumystardy baıandap, klımattyń ózgerisin tıimdi retteý baǵytynda iske asyp jatqan tájirıbelerdi ortaǵa saldy.
«Azııa keńesiniń ekologııalyq máselelerge baılanysty mınıstrler deńgeıindegi kezdesýi birinshi ret ótip otyr. Konferentsııanyń nátıjesinde mardymdy qujat qabyldanady dep otyrmyz. Jalpy qoǵam bolashaqta tabıǵatpen qalaı úılesimdi damı alatynyn talqylaıtyn jańa alań qurylyp jatyr deýge de bolady. Bul mınıstrler konferentsııasy dástúrge aınala ma, joq pa, ony ýaqyt kórsetedi. Halyqaralyq qoǵamdastyqta ekologııalyq máselelerge kóńil erekshe aýyp otyr. Bul máselelerdi sheshýge jalǵyz memlekettiń áleýeti jetpeıtinin eskersek, Azııa keńesiniń aıasyndaǵy mınıstrler kezdesýi tıimdi alań bola alady dep kútemiz», - deıdi AÓSShK bas hatshysy Qaırat Sarybaı.
Konferentsııada transshekaralyq ózenderdi tıimdi paıdalaný, Araldy qutqarý máseleleri de sóz boldy.
«Bul konferentsııanyń eń basty nátıjesi – qorshaǵan orta máseleleriniń Azııa keńesi aıasynda tuńǵysh ret mınıstrler deńgeıinde qolǵa alynýy. Bul kezdesýdiń qorytyndysy bizdiń elge, úkimetke eshqandaı mindetteme júktemeıdi. Kerisinshe, kóp paıda ákeledi. Óıtkeni qazirgi tańda qorshaǵan orta baǵytyndaǵy Qazaqstandy erekshe tolǵandyratyn Araldy qutqarý, sý bólisý sııaqty máselelerdi óz betimizben sheshý múmkin emes. Sondyqtan ekologııa máselesinde Azııa keńesine múshe memleketter ózara yntymaqta jumys istese, paıda kóbirek bolady», - deıdi keńestiń bas hatshysy.
Konferentsııa sońynda keńeske múshe elderdiń mınıstrleri ekologııa máseleleri boıynsha ortaq málimdeme qabyldady.
«Biz klımat ózgerýiniń aýyrtpalyǵyn jáne onyń bizdiń aımaqqa tıgizetin áserin túsine otyryp, klımattyń ózgerýine qarsy kúrestegi ozyq tájirıbeler men jetistikterdi bólisýge mindetteme alamyz. Biz ómir súrý men densaýlyq sapasyn jaqsartýǵa, klımattyń ózgerýin tejep, beıimdelýge, bıoalýandyqty saqtaýǵa, sýdy turaqty basqaryp, ekojúıelerdiń lastanýyna ózara tájirıbe almasa otyryp qarsy turýǵa nıettimiz», - delingen málimdeme mátininde.