AÓK salasynda monıtorıng, taldaý jáne boljaý ortalyǵy qurylady

NUR-SULTAN. QazAqparat – Qazaqstannyń agroónerkásiptik kesheninde monıtorıng, taldaý jáne boljaý boıynsha biryńǵaı tsıfrlyq sıtýatsııalyq ortalyq qurylady. Bul jaıly Parlament Májilisinde agrarlyq ǵylymdy, bilim jáne óndiristi ıntegratsııalaý máseleleri boıynsha otyrysta Ulttyq agrarlyq ǵylymı bilim berý ortalyǵynyń basqarma tóraǵasy Tóleýtaı Raqymbekov málim etti, dep habarlaıdy QazAqparat tilshisi.

«Qazaqstannyń agroónerkásiptik kesheninde monıtorıng, taldaý jáne boljaý boıynsha biryńǵaı tsıfrlyq sıtýatsııalyq ortalyq qurý máselesin pysyqtap jatyrmyz. Ol bizdiń ortalyqtyń bazasynda ashylyp, aýyl sharýashylyǵy salasynyń barlyq aqparattyq júıesin ıntegratsııalaýdy kózdeıdi», - dedi Tóleýtaı Raqymbekov.

Ulttyq agrarlyq ǵylymı bilim berý ortalyǵynyń basshysy ókinishke oraı Qazaqstan áli kúnge deıin AQSh aýyl sharýashylyǵy mınıstrliginiń boljamdy málimetterin paıdalanatynyn jetkizdi. Onyń aıtýynsha, tsıfrlandyrý salasyndaǵy mamandar men qarapaıym sharýa qojalyq ıelerin kezdestirip, fermerlerdiń bul baǵyttaǵy tájirıbesin arttyrý kerek.

«Tsıfrlandyrý salasynyń artyqshylyqtary sharýa ıelerin artyq shyǵyndardan arylýǵa kómekteser edi», - dedi ol.

Aıta ketsek, buǵan deıin Tóleýtaı Raqymbekov otandyq agrarlyq ǵylymnyń basty problemalaryn ataǵan bolatyn. Onyń aıtýynsha, bizdegi agrarlyq ǵylymnyń basty máselesi – bilim berý, transfert pen kommertsııalyq tehnologııalardy usyný boıynsha uıymdastyrý jumysynyń álsizdigi bolyp otyr.