AÓІSShK-ge múshe elder Qazaqstandaǵy ahýaldyń tez arada durystalǵanyna múddeli
Bul týraly QR Syrtqy ister mınıstrliginde sheteldik dıplomatııalyq korpýs ókilderine arnalǵan brıfıngte AÓІSShK atqarýshy dırektory Qaırat Sarybaı aıtty, dep habarlaıdy QazAqparat tilshisi halyqaralyq uıymnyń resmı aıtyna silteme jasap.
«Eń aldymen Qazaqstandaǵy lańkestik aktilerdiń saldarynan qaza tapqandardyń týǵan-týystary men jaqyndaryna kóńil aıtamyn. Prezıdent Qasym-Jomart Toqaev pen Qazaqstan Úkimetiniń lańkestik áreketterge qarsy turý, ahýaldy shıelenistirmeý, eldegi qoǵamdyq qaýipsizdikti jáne áleýmettik turaqtylyqty qamtamasyz etý úshin qabyldanǵan is-sharalaryn tolyqtaı qoldaıtyndyǵymdy rastaımyn. Daǵdarystyń «shıelenisti sátte» azamattyq jaýapkershilik pen tynyshtyq saqtaı bilgen Qazaqstan azamattaryna rızashylyǵymdy bildiremin. Men Almatydaǵy oqıǵalardyń kýási boldym jáne quqyq qorǵaý organdarynyń is-áreketi teńgerimdi, zań aıasynda ári ahýaldyń damýyna saı bolǵandyǵyn jaýapkershilikpen málimdeımin. Sonymen qatar polıtsııanyń narazylyqtyń beıbit aktsııalaryna qatysty is-áreketi durys bolǵanyn atap ótemin. Degenmen, ekstremıstik jáne bandıttik elementter narazylyq aktsııalaryn paıdalandy jáne bul qalada quqyq qorǵaý organdaryna, azamattar men olardyń múlikterine qarsy zorlyq-zombylyqtyń kúrt beleń artýyna alyp keldi», - dedi Qaırat Sarybaı.
Ol Prezıdent Qasym-Jomart Toqaevtyń Májilistegi sóz sóıleýinde oryn alǵan daǵdarysqa tereń saraptama jasalyp, ony eńserý is-sharalary jarııa etilgendigin eske salyp ótti.
«AÓІSShK-ge múshe elder Qazaqstandaǵy ahýaldyń tez arada durystalýyna shynaıy túrde múddeli ekendigin rastaımyn. Oǵan meniń jekelegen múshe memleketterdiń ókilderimen baılanysym dálel bolady. Qazaqstannyń UQShU-daǵy seriktesteriniń kómegi Azııadaǵy yntymaqtastyqtyń kópjaqty formatynyń qajet ekendigin jáne qaýipsizdiktiń qazirgi syn-tegeýirinderine qarsy is-qımylda kóp taraptylyqtyń mańyzdylyǵyn is júzinde kórsetip berdi», - dedi AÓІSShK atqarýshy dırektory.