Ańyzǵa aınalǵan Balýan Sholaq jaıynda fılm túsirildi
Qazirgi ýaqytta rejısser Nurgeldi Sadyǵulovtyń kórkem fılmdegi alǵashqy týyndysynyń montajdaý kezeńi júrip jatyr. Atalǵan tarıhı shyǵarma ánshi jáne kompozıtor, aty ańyzǵa aınalǵan Balýan Sholaq ómirinen syr shertedi.
«Qazir montajdy bitirgeli otyrmyz. Montaj - fılmniń úshinshi jáne sońǵy kezeńi. Montajǵa kóp ýaqytym ketti, sebebi túsirilgen materıal aýqymdy ári qyzyqty. Montajdyń sońǵy nusqasyn ''Qazaqfılmniń'' Eksperttik keńesine kórsetemiz. Sodan keıin ǵana dybystaý jumystary, grafıka jáne tústeý jasaımyz», - dedi Nurgeldi Sadyǵulov.
Sondaı-aq, rejısser Býrabaıda ótken túsirilimder týraly da sóz etti.
«Kókshetaýdaǵy túsirilimder óte sátti ótti dep oılaımyn, sebebi men úshin tabıǵat taptyrmas akter. Túsirilim kezinde jańbyr jaýyp, boran boldy. Soǵan qaramastan túsirilim top ta, akterler de bir adamdaı jumys istedi. Sonyń arqasynda aldymyzǵa qoıǵan maqsatymyzǵa qol jetkizdik. Montajdap bolǵan soń, epılog kerek degen sheshim qabyldadym. Fılmniń epılogyn túsirsek fılm áserli ári taqyryp keńinen ashylady dep senem», - dedi ol.
Sh.Aımanov atyndaǵy «Qazaqfılm» kınostýdııasy baspasóz qyzmetiniń málimetinshe, fılmniń túsirilimderi Almaty oblysy, Pavlodar qalasy jáne Býrabaıda ótken. Almaty oblysy Kegen jáne Jalańash aýyldarynda fılmniń negizgi bóligi túsirilgen. Kópshilik sahnalarǵa úsh júzge jýyq adam qatysqan.
«Eń bastysy men úshin Balýan Sholaqtyń beınesin úlken ekranǵa ákelý jáne sol dáýirdi kórsetý. Qanshalyqty sátti nemese sátsiz shyqanyn ekran kórsetedi. Túsirilgen materıal júz paıyzǵa unaıdy dep aıta almaımyn. Keıde montajdan ashýmen ketemin, keıde qýanyshpen shyǵam. Akterlerdiń barlyǵy da baryn saldy. Dese de, Balýan Sholaqtyń rólindegi Erkebulan Daıyrov, Aqylbaıdy somdaǵan Medǵat Ómirálıev pen Dolgonosovty oınaǵan Aleksandr Bagrıantsevti erekshe atap ótkim keledi», - dedi fılm rejısseri.
Aıta keteıik, fılmge eki birdeı treıler jáne eki saýndtrek ázirlenip jatyr. Shyǵarmashylyq top olardy jaqyn arada kórermen nazaryna usynady. Fılm jyldyń sońynda kórermen nazaryna jol tartady dep josparlanýda.