Antonıo Gýterrısh: Azııanyń beıbit ári órkendegen aımaq bolýy bárimiz úshin utymdy

ASTANA. QazAqparat – BUU Bas hatshysy Antonıo Gýterrısh Astanada ótip jatqan Azııadaǵy ózara is-qımyl jáne senim sharalary keńesiniń altynshy sammıtine onlaın qatysyp, sóz sóıledi. Bas hatshy ótken 30 jylda Azııa elderi arasyndaǵy dıalogtyń mańyzdy tuǵyrnamasyna aınalǵanyn atady, dep habarlaıdy QazAqparat tilshisi.

BUU Bas hatshysy AÓSShK VI sammıtiniń plenarlyq otyrysynda sóılegen sózinde geosaıası shıelenister men qaqtyǵystardyń artyp kele jatqan tusta senim men yntymaqtastyq álsirep bara jatqanyn atap ótti. Sondaı-aq, ol qazirgi daǵdarys halyqtyń osal toptaryna qatty áser etip, kedeılikti, ashtyqty ýshyqtyryp, áleýmettik-saıası tolqýlar týdyratynyn aıtty.

Aıtýynsha, osyndaı shaqta aımaqtyq yntymaqty nyǵaıtý burynǵydan da mańyzdy bolyp tur.

«Keıingi 30 jylda AÓSShK Azııa elderi arasyndaǵy dıalogtyń mańyzdy tuǵyrnamasyna aınaldy. Azııanyń beıbit ári órkendegen aımaq bolýy bárimiz úshin utymdy. Osy turǵyda áriptestigimiz úshin, beıbitshilik pen turaqtylyqty ilgeriletý, kópjaqty yntymaqtastyqty nyǵaıtý, adam quqyqtary men turaqty damýdy ilgeriletý sııaqty ortaq maqsattarymyz úshin alǵys aıtamyn. Zaman synaqtaryn birge jeńip, Azııa men búkil álem úshin jarqyn bolashaqty qamtamasyz eteıik. Sol jolda bárińizge sáttilik tileımin», - dedi Antonıo Gýterrısh.