Antıvakserlerdiń vaktsınaǵa qatysty dańǵaza áńgimelerine senýdiń qajeti joq - Prezıdent
«Qazir buqaralyq aqparat quraldarynda ekpe salýǵa qatysty jalǵan qujattar týraly derekter paıda bolyp jatyr. Bul qoǵam úshin óte qaýipti jaǵdaı. Óıtkeni, halyq kóp jınalatyn jerlerde dert juqtyrǵan adam da júrýi múmkin degen sóz. Sondyqtan quqyq qorǵaý organdary osy máselege basa nazar aýdarýǵa tıis. Biz pandemııamen kúrestiń negizgi joly vaktsınatsııa ekenin túsinýimiz qajet. Bul aıqyn nárse»,- dedi QR Prezıdenti Úkimettiń keńeıtilgen otyrysy barysynda.
Memleket basshysy Úkimet elimizdegi vaktsınatsııa boıynsha qazirgi kórsetkishterdi baıandaǵanyn eske salyp ótti.
«Alaıda ashyǵyn aıtý kerek, bul jumystyń qarqyny áli de mardymsyz. Naqty qadamdar jasaý qajet. Túptep kelgende azamattarymyz ózderiniń jáne jaqyn týystarynyń densaýlyǵyn oılap, sanaly túrde sheshim qabyldaýy kerek. Antıvakserlerdiń qaýeset, dańǵaza áńgimelerine senýdiń qajeti joq. Sondyqtan biz ekpe salý naýqanyn jalǵastyramyz. Al keıbir jekelegen salalarda mindetti vaktsına saldyrý qajet bolady. Bul úshin zańnamalyq ta, konstıtýtsııalyq da negiz bar. Týrasyn aıtsaq, bul árkimniń óz otandastary aldyndaǵy mindeti, paryzy», - dedi Qasym-Jomart Toqaev.