AntikorLIVE alańynda BAQ jáne azamattyq qoǵamnyń róli talqylandy
Onlaın rejımde sarapshylar halyqtyń sybaılas jemqorlyqqa qarsy mádenıetin qalyptastyrý jóninde óz pikirlerimen bólisti. Osyǵan baılanysty «Qazaq TV» telearnasynyń dırektory Maııa Bekbaeva sybaılas jemqorlyq deńgeıin tómendetý sharalaryn aqparattyq qoldaýda aqparat quraldarynyń mańyzdylyǵyn aıtty.
«Sybaılas jemqorlyqqa qarsy kúres – búgingi kúni qoǵamnyń aldynda turǵan negizgi syn-qaterdiń biri. Buqaralyq aqparat quraldary minez-qulyq stereotıpterin qalyptastyryp, qoǵamdaǵy tendentsııalarǵa áser etetinin eskersek, bul jumysta buqaralyq aqparat quraldarynyń róli óte mańyzdy», - dedi Maııa Bekbaeva.
Ol sondaı-aq sybaılas jemqorlyqqa qarsy is-qımyl sharalary jaıynda halyqty habardar etýge sapaly baǵdarlamalar qajettigin aıtty. Spıkerdiń pikirinshe, sarapshylar men azamattyq sektor pikir almasýǵa qatysa alatyn dıalog alańdaryn, onyń ishinde áleýmettik jelide qurý tıimdi bolady.
AntikorLIVE alańyndaǵy talqylaýdyń taǵy bir taqyryby sybaılas jemqorlyqqa qarsy is-qımyldaǵy azamattyq qoǵamnyń róline arnaldy. Qazaqstannyń Azamattyq alıansynyń prezıdenti Baný Nurǵazıeva azamattyq qoǵamnyń belsendiligi, qoǵamdyq baqylaý jáne sybaılas jemqorlyqqa qarsy is-qımyldaǵy ÚEU róli týraly suraqtarǵa jaýap berdi. Sondaı-aq spıker «Qoǵamdyq baqylaý týraly» QR zań jobasynyń mazmuny boıynsha jumys tobynyń atqarǵan jumysy týraly aıtyp berdi.
«Zań jobasy aıasynda, eger qoǵamdyq baqylaý nysany anyqtalǵan zań buzýshylyqtar, usynymdar nemese eskertýler boıynsha aqparat alsa, 10 jumys kúni ishinde júrgizilgen jumys týraly jazbasha jaýap berýi tıis. Zań aıasynda bul baqylaý nysanynyń mindeti», – dedi Baný Nurǵazıeva.
Qazaqstannyń Azamattyq alıansynyń prezıdenti qazirgi tańda azamattyq qoǵam sybaılas jemqorlyqqa qarsy is-qımyl protsesine qoǵamdyq keńester men monıtorıng toptary arqyly tartylyp jatqanyn da tilge tıek etti.
Aıta ketý kerek, AntikorLIVE alańy QR Sybaılas jemqorlyqqa qarsy is-qımyl agenttigi qurǵan turaqty dıalog alańy sanalady. Spıkerler retinde úkimettik emes uıymdardyń, memlekettik organdardyń, Adaldyq Alany jobalyq keńseleriniń ókilderi sóz sóıleıdi.