Antıkorǵa shaǵymdanǵan Almaty oblysynyń sharýalary egistiktiń sý qunyn tómendetti
Esterińizge sala keteıik, buǵan deıin BAQ pen áleýmettik jelilerde Eńbekshiqazaq aýdanynyń sharýa jáne fermer qojalyqtary sýarmaly sý tarıfteriniń kóterilýine jáne onyń tapshylyǵyna shaǵymdanǵan bolatyn.
Osy jyldyń basynda bul máseleni Almaty oblysy boıynsha Sybaılas jemqorlyqqa qarsy qyzmet departamenti qolǵa aldy.
Departament óńirdiń ırrıgatsııalyq jelileriniń qyzmetine sybaılas jemqorlyqqa qarsy monıtorıng júrgizdi. Taldaý barysynda aýyl turǵyndary aýyl sharýashylyǵy kooperatıvteriniń jumysyna jáne olardyń sýarmaly sý jetkizgen tarıfterine qanaǵattanbaıtyny anyqtaldy.
2015 jyldan bastap óńirde 24 aýyl sharýashylyǵy kooperatıvi jumys istegen. Olar sýdy D.Qonaev atyndaǵy Úlken Almaty kanalynan 1 tekshe metr sý úshin 78 tıynnan alyp, al sharýalarǵa bir gektar jer úshin 20 000 – 28 000 teńgeden bergen. Osylaısha monopolıst rólin atqaryp kelgen.
Sharýa qojalyǵynyń menshik ıesiniń aıtýynsha, bir maýsymda ol 60 gektar jerdi sýarǵany úshin 1 mln teńgeden astam aqsha tólegen.
Bul rette, sybaılas jemqorlyqqa qarsy qyzmette atap ótkendeı, AShK monopolııaǵa qarsy organda óz tarıfterin bekitýi tıis jáne olardyń tarıfi gektar jer úshin emes, bir tekshe metr sý úshin eseptelýi kerek bolatyn.
Sonymen qatar, monopolııaǵa qarsy organnyń aqparaty boıynsha 5 AShK-de tarıf bekitilgen. Tek 2 AShK sýarý arnalaryn paıdalaný quqyǵyna ıe bolǵan. Al qalǵany AShK aýyl ákimdikteriniń teńgeriminde bolǵan sý obektilerinde óz qyzmetin júrgize bergen.
Qalyptasqan jaǵdaı, sýarmaly sýdy jasandy túrde joǵarǵy baǵaǵa kótermeleýi arqyly aýyl sharýashylyǵy taýaryn óndirýshilerdiń quqyqtarynyń buzylýyna alyp keldi.
Sharýa qojalyqtarynyń quqyqtaryn qalpyna keltirý maqsatynda Sybaılas jemqorlyqqa qarsy qyzmettiń usynysy boıynsha oblys ákimdigi «Almaty oblystyq Sý sharýashylyǵy» kommýnaldyq kásiporny túrindegi sý sharýashylyǵynyń biryńǵaı operatoryn quryp, onyń balansyna barlyq sýarý jelilerin ótkizdi. Qazirgi tańda kásiporyn arnalardy tazartýmen aınalysýda.
Sonymen qatar, BAK pen sharýa qojalyqtary arasynda bastapqy quny 1 tekshe sý úshin 70 tıyn bolatyn sharttardy tikeleı jasasý rásimi bastaldy.
«Sondaı-aq, AShK sybaılas jemqorlyq sýbektisi bolyp tabylmaıtynyn eskere otyryp, oblys prokýratýrasymen birlesip olardyń qyzmetine tekserý is-sharalaryn júrgizý máselesi talqylanýda.
Nátıjesinde, aǵymdaǵy jyly 30 000-ǵa jýyq sharýa jáne fermer qojalyqtary sýdy qolaıly baǵamen alady. Bul bolashaq eginge jáne aýyl halqynyń ál-aýqatyna oń áser etedi»,- delingen Sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń habarlamasynda.
Esterińizge sala keteıik, bıylǵy jyldyń basynda Sybaılas jemqorlyqqa qarsy qyzmet «Bezneske jol» jobasyn iske asyrý týraly jarııalady. Onyń aıasynda kásipkerlerdiń quqyqtary ákimshilik kedergilerden jáne laýazymdy tulǵalardyń zańsyz sheshimderinen qorǵalady.