SQO-da qashyp júrgen sottalǵan ormanda jerkepede jasyrynǵan
SQO polıtsııa departamenti baspasóz qyzmetiniń málimetinshe, M.Jumabaev aýdandyq polıtsııa bólimine aýyl turǵynynan jylqysynyń urlanǵandyǵy týraly aryz tústi. Bireý onyń qorasyna túsip, baılaýly turǵan malyn er-toqym, júgenimen jáne kıip júrgen pımasymen birge alyp ketkenin habarlaǵan.
Jedel-izdestirý is-sharalary barysynda jedel ýákilder men jylqynyń ıesi qar ústindegi izge túsip, 30 shaqyrymdaı júredi. Nátıjesinde polıtsııa qyzmetkerleri «Býlaevo-Molodogvardeıskoe» avtojolynyń boıyndaǵy orman ishine kirip, jerkepeniń ústinen túsedi.
Jerkepe qalyń butalardyń arasyna, jerdi úńgip qazyp turǵyzylǵan, ishine qoldan jasalǵan pesh ornatylǵan. Aýdannyń 48 jastaǵy turǵyny jylqy etin múshelep jatqan jerinde ustaldy.
Polıtseıler kúdiktiniń osy qylmysty jasaǵanyn aldyn ala boljaǵan eken.
— Bul er adam buryn páter urlyǵy úshin sottalyp, úsh jyl alty aıǵa bas bostandyǵy shektelgen, biraq probatsııalyq baqylaýǵa turmaı, qashyp ketip boı tasalaǵan. Dál osy adam urlanǵan jylqynyń ıesinde buryn jumys istegen, qora-qopsynyń ornalasqan jerin jáne qandaı jylqylardyń qolǵa úıretilgenin jaqsy bilgen. Joǵalǵan pıma qylmyskerdiń adamdardan jasyrynyp júrgenin baıqatty, — deıdi aýdandyq polıtsııa bóliminiń bastyǵy Asan Meıramov.
Qazirgi ýaqytta er adam qamaýǵa alyndy. Ol mal jáne páter urlyǵyn jasady degen kúdikpen ustaldy. Aýdan turǵyny páter urlyǵyn sot úkimi shyqqannan keıin qashyp júrip jasaǵan. Sondaı-aq, ol probatsııalyq baqylaý erejelerin buzǵany úshin jaýapkershilikke tartylady.
Jyl basynan beri SQO-da mal urlyǵynyń 5 faktisi tirkeldi, onyń 3-eýi ashyldy.
Qarasha aıynda ótken «Mal urysy» jedel-profılaktıkalyq is-sharasy barysynda buryn jasalǵan bir qylmys ashylyp, etti tasymaldaý jáne ótkizý kezindegi veterınarııalyq baqylaýdy buzýdyń 37 deregi anyqtaldy.
Buǵan deıin SQO-da 6 mln teńgeniń veıpin satyp júrgen jigit ustalǵanyn jazǵan edik.