Antıkorda bıznesmenderdi sebepsiz mazalaý tyıyla bastady

NUR-SULTAN. QazAqparat – Sybaılas jemqorlyqqa qarsy qyzmet organdarynyń ǵımaratyna kásipkerlerdi shaqyrtý derekterine onlaın monıtorıng engizýdiń arqasynda bıznes ókilderin negizsiz mazalaý tyıyla bastaǵan. Sybaılas jemqorlyqqa qarsy is-qımyl agenttiginiń tóraǵasy Oljas Bektenov vedomstvonyń alqa otyrysynda osylaı dep málim etti, dep habarlaıdy QazAqparat tilshisi.

«Memleket basshysynyń tapsyrmasy boıynsha bıznestiń isine zańsyz kıligýden, onyń ishinde bizdiń jaýapsyz qyzmetkerlerden de qorǵaıtyn tetikter engizilip jatyr. Kásipkerlerge qatysy bar isterdi tergeýdiń algorıtmi ázirlendi. Munda sotqa deıingi tergeý isteriniń biryńǵaı tizbesin tirkeýden bastap, jaýap alý jáne tintý júrgizý tártibi túgel qaıta reglamentteledi», - dedi Oljas Bektenov.

Antıkor basshysy kásipkerlerdiń ústinen jemqorlyq jóninde túsetin aryz-shaǵymdar muqııat súzgiden ótetinin atady.

«Biz kásipkerlerdiń ústinen is qozǵaý týraly bastamalardyń 15 paıyzynan bas tarttyq. Óıtkeni oǵan negiz bolǵan joq. Kásipkerlerdi vedomstvo ǵımaratyna negizsiz shaqyrtýdyń kez kelgen deregi onlaın monıtorıng arqyly qashyqtan baqylanady. Sonyń arqasynda antıkor ǵımaratyna shaqyrylatyn kásipkerlerdiń sany 2 ese azaıdy. Sonymen qatar, agenttik janynan «Atameken» ulttyq kásipkerler palatasynyń ókilderi qatysatyn arnaıy jumys toby quryldy. Onyń negizgi mindeti – aqparatty jedel almasyp, ózge memlekettik organdardyń áreketi týraly bıznestiń shaǵymdaryn birlesip qaraý», - dedi agenttik basshysy.