Antıkor sporttyq ataqtardy negizsiz taratqan sportshynyń ústinen is qozǵady

<p>ASTANA. KAZINFORM &ndash; Antıkor áleýmettik jelilerdi monıtorıngileý barysynda qazaqstandyq aralas jekpe-jek sportshysy A. Áshimovtiń jalǵan sportshylarǵa &laquo;QR eńbek sińirgen jattyqtyrýshysy&raquo; jáne &laquo;QR halyqaralyq dárejedegi sport sheberi&raquo; sporttyq ataqtaryn negizsiz berý týraly beıne aqparatyn zerdeledi.</p>

Nátıjesinde, Sybaılas jemqorlyqqa qarsy qyzmet atalǵan jarııalanymǵa ýaqytyly den qoıyp, sotqa deıingi tergeýdi tirkedi.

Agenttiktiń usynysy boıynsha jalǵan sportshylar sporttyq ataqtarynan aıyryldy.

Jemqorlyq táýekelderin syrtqy taldaý qorytyndysy boıynsha Agenttik Týrızm jáne sport mınıstrliginiń atyna jemqorlyq táýekelderin joıý boıynsha usynystar engizdi.

«Sportty teris paıdalanǵany úshin jaýapkershilik týraly halyqaralyq standarttardy ratıfıkatsııalaý, joǵary jetistikter sportyn qarjylandyrýdy ortalyqtandyrý, qarjylandyrý nátıjelerin baǵalaýǵa múmkindik beretin sport, ınfraqurylym, sporttyq is-sharalar men jetistikter salasynda aınalysatyn adamdar boıynsha tolyq derekterdi qamtıtyn E-sport Ulttyq tsıfrlyq platformasyn engizý usynyldy», - delingen habarlamada.

Bul sportshylar, ınfraqurylym, jarystar men jetistikter týraly biryńǵaı derekter qoımasyn qurýdy kózdeıdi jáne sport salasyndaǵy jemqorlyq táýekelderin boldyrmaýǵa múmkindik beredi.

Tergeý jalǵasyp jatyr.  

Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.

Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.