Antıkor shetelden qaıtarylǵan 38 mlrd teńgeni qaıda jumsaıdy

ASTANA. QazAqparat – Sybaılas jemqorlyqqa qarsy kúres agenttigi arqyly elge qaıtarylǵan qarajat mektep salý men jóndeýge jumsalmaq. Bul týraly atalǵan vedomstvo tóraǵasynyń orynbasary Ashat Jumaǵalı málim etti, dep habarlaıdy QazAqparat.

«Memleket basshysynyń tapsyrmasyna sáıkes, Sybaılas jemqorlyqqa qarsy qyzmet agenttigi aktıvterdi qaıtarý jáne keltirilgen zalaldy óteý boıynsha jumysty jalǵastyrýda. Agenttik tóraǵasynyń kúndelikti úılestirýimen jedel-tergeý qurylymdyq bólimsheleriniń jolǵa qoıylǵan jumysy dáleldemelerdi ýaqtyly belgileýge, bekitýge jáne tıisti sharalar qabyldaýǵa múmkindik beredi», - dep jazdy Ashat Jumaǵalı Facebook paraqshasynda.

Onyń aıtýynsha, ózekti ister agenttik tóraǵasynyń jeke qadaǵalaýynda.

«Máselen, ótken aıda shet elden 82 mln AQSh dollary qaıtaryldy. Nátıjesinde el bıýdjeti taǵy 38 mlrd teńgege tolyqty. Іster boıynsha alynǵan aqshalaı qarajat «Bilim ınfraqurylymyn qoldaý qoryna» jiberilip jatyr. Qazir arnaıy shotta, shamamen, 120 mlrd teńge jınaqtalǵan. Ol qarjy mektep salýǵa jáne jóndeýge paıdalanylady», - dep túsindirip ótti ol.

Sondaı-aq, tóraǵa orynbasary atalǵan baǵyttaǵy jumystyń jalǵasatynyn aıtty.

Foto: Facebook