Antıkor óńirlerdegi jemqorlyqpen qalaı kúresedi

NUR-SULTAN. QazAqparat – Sybaılas jemqorlyqqa qarsy is-qımyl agenttiginiń tóraǵasy Oljas Bektenov óńirlerdegi jemqorlyqpen qalaı kúresetinin aıtty, dep habarlaıdy QazAqparat tilshisi.

«Sybaılas jemqorlyqqa qarsy is-qımyl agenttigi árbir oblys jáne respýblıkalyq mańyzy bar qala úshin sybaılas jemqorlyq táýekelderiniń kartasyn ázirledi. Bul - protsesterdiń ashyq bolmaýyna, ákimshilik kedergilerge, sheneýnikterdiń asyqpaýyna nemese ozbyrlyǵyna, zańnamanyń jetildirilmeýine baılanysty sheshimin tappaıtyn kókeıkesti máselelerdiń tizbesi. Saldarynan osy negizde jemqorlyq shemalary men qoldanystaǵy normalarmen, erejelermen búrkemelengen máselelerdi zańsyz sheshý múmkindikteri paıda bolady»,- dedi ol agenttiktiń alqa otyrysynda.

Onyń sózine qaraǵanda, atalǵan táýekelder kartasy naqty óńirdegi aýmaqtyq organdardyń jumysyna baǵdar bolmaq.

«Bul karta qyzmet jumysynyń sapasyn baǵalaý júıesiniń negizi bolady. Birneshe jolmen baǵalaý josparlanǵan. Birinshisi - ishki baǵalaý. Bul – qabyldanǵan sharalardyń tereńdigi men tolyqtyǵy. Sonymen qatar, qyzmetkerlerdiń kásibıligi men paıdaly júktemege baǵa beriledi. Ekinshisi - qoǵamdyq baqylaý. Ol arqyly óńirdegi naqty basshy qyzmetiniń sybaılas jemqorlyqty joıýǵa jáne «problemalyq» aımaqtardy joıýǵa áseri baqylanady. Munda baǵalaý quraly halyq, bıznes, úkimettik emes uıymdardyń saýalnamasy bolady. Biz aldyn ala anyqtalǵan táýekelder týraly óńir ákimi men beıindi mınıstrlikti habardar etemiz jáne obektini sapaly jáne ýaqtyly salýǵa jáne paıdalanýǵa berýge qol jetkizemiz. Buzýshylyqtarǵa jol bergen memlekettik qyzmetshiler men merdigerler, jasalǵan árekettiń aýyrlyǵyna baılanysty tártiptik, ákimshilik nemese qylmystyq tártippen jazalanady», - dedi Oljas Bektenov.