Antıkor ókili densaýlyq saqtaý júıesindegi sybaılas jemqorlyq táýekelderin atady

NUR-SULTAN. QazAqparat – Sybaılas jemqorlyqqa qarsy is-qımyl agenttiginiń Preventsııa qyzmeti basshysynyń orynbasary Ǵanıjan Asanuly densaýlyq saqtaý salasyndaǵy jemqorlyqqa jol ashatyn olqylyqtardy atady, dep habarlaıdy QazAqparat tilshisi.

«Ózderińiz biletindeı, pandemııa densaýlyq saqtaýdyń kóptegen máselelerin, sonyń ishinde jemqorlyq táýekelderin kórsetti. Ótken jyly Áleýmettik medıtsınalyq saqtandyrý qory men Densaýlyq saqtaý mınıstrliginiń ortalyq apparatynda taldaý jumystary júrgizilgen edi. Bıyl Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti men Sanıtarııalyq-epıdemıologııalyq baqylaý komıtetinde syrtqy taldaýlar aıaqtaldy. Barlyǵy 138 jemqorlyq táýekel anyqtaldy, olar boıynsha 246 usynym ázirlendi», - degen agentik ókili anyqtalǵan olqylyqtardyń negizgilerine toqtaldy.

«Birinshi. «Maqsattyq kórsetkishterdiń jetilmegendigi» belgili boldy. «Patsıentterdiń medıtsınalyq kómek sapasyna qanaǵattanýy» nátıjelerin «qolmen» ózgertý arqly burmalanýynyń joǵary táýekeli belgilendi. Bul densaýlyq saqtaý júıesiniń sapasy boıynsha obektıvti kórinis bermeıdi.

Ekinshi. Dári-dármektiń baǵasyn jasandy túrde kóterý táýekeli basym. Baǵa ótinish berýshiniń tekserilmegen aqparatyna nemese onyń kommertsııalyq usynysyna baılanysty qalyptasady. Dári-dármekterdiń baǵasyna olar bolmaǵan kezde de marketıngtik shyǵyndardy qosýy múmkin. Qoldanystaǵy kóterme-bólshek saýda erejeleri baǵany 30%-ǵa qosymsha arttyrýǵa múmkindik beredi», - deıdi Ǵanıjan Asanuly.

Onyń aıtýyna qaraǵanda, medıtsınalyq qyzmetterdiń sapasyn baǵalaý úshin júrgizilgen 147 tekserý kezinde syrttan sarapshylar shaqyrylmaǵan.

«Saraptama qorytyndylaryn ýákiletti emes adamdar jasady. Oǵan «Halyq densaýlyǵy jáne densaýlyq saqtaý júıesi týraly» kodeks pen zańǵa táýeldi akti arasyndaǵy qaıshylyq sebep bolǵan.

Epıdemıologııalyq monıtorıng jáne kameraldyq baqylaý salasy tsıfrlandyrylmaǵan. 600 mln teńgege satyp alynǵan planshetter men mobıldi prınterler ákimshilik praktıkany avtomattandyrý úshin paıdalanylmaıdy. Baqylaý qujattary qolmen qalyptastyrylady, bul sybaılas jemqorlyqqa jaǵdaı jasaıdy», - dedi agenttiń ókili.

Joǵaryda kórsetilgen sybaılas jemqorlyq táýekelderi boıynsha usynystar ázirlenip, Densaýlyq saqtaý mınıstrligine joldandy.

Foto: memkyzmet.kz