Antıkor el mektepteriniń qarjylyq jaǵdaıyn tekserip jatyr

ASTANA. QazAqparat – Mınıstrlik Sybaılas jemaqorlyqqa qarsy is-qımyl agenttigimen birlesip mektepterdiń bıýdjet qarajatyn ıgerý barysyn tekserip jatyr. Bul týraly Oqý-aǵartý mınıstri Ǵanı Beısembaev málim etti, dep habarlaıdy QzaAqparat tilshisi.

«Mınıstr retinde qyzmetke kiriskende eldegi barlyq mektep dırektorymen jınalys ótkizdim. Jıynda jumystyń tıisti ári sapaly deńgeıde atqarylý kerektigi aıtyldy. Sonymen qatar mektepterde zańbuzýshylyqtarǵa jol bermeý máselesi de qozǵaldy. Jýyrda Taldyqorǵanda jáne Qyzylorda (Jańaqorǵan aýdany) oblysyndaǵy mektepterde sybaılas jemqorlyqqa qatysty shý shyqqanyn biletin shyǵarsyzdar. Osyǵan baılanysty bizdiń mınıstrlik osydan 1 aı buryn Sybaılas jemqorlyqqa qarsy is-qımyl agenttigimen birlese otyryp, búkil mektepterdiń qarjylyq jaǵdaıyn tekserýdi bastap ketti», - dedi Ǵanı Beısembaev Úkimet otyrysynan keıin BAQ ókilderiniń saýalyna jaýap bere turyp.

Mınıstrdiń aıtýynsha, tekserý aıasynda mektepterde bolǵan zańbuzýshylyqtar boıynsha saraptama jasalady.

«Saraptama júrgizý nátıjesinde anyqtalǵan faktiler quzyrly organdardyń qaraýyna jiberilip, tıisti sharalar qabyldanady», - deıdi vedomstvo basshysy.

Buǵan deıin Ǵ. Beısembaev memlekettik balabaqshalardy tolyǵymen qazaq tiline kóshirý jaǵy qaralyp jatqanyn málimdegen edi.