Antıkor byltyr 653 mlrd teńgeniń aktıvin memleketke qaıtarǵan

ASTANA. QazAqparat – Byltyr sybaılas jemqorlyq kúdigine ilingen 83 adamǵa izdeý jarııalanyp, 24-i ustalǵan. Olardyń arasynda 11 jyl boıy ustatpaı júrgen kúdikti de bar, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttiginiń 2022 jylǵy sybaılas jemqorlyqqa qarsy is-qımyl týraly ulttyq baıandamasynda osy jáne ózge derekter keltirilgen.

«Jalpy, agenttik 653 mlrd teńgege jýyq somadaǵy múliktik aktıvter men aqshalaı qarajatty qaıtardy. Sybaılas jemqorlyq qylmysy týraly habarlaǵany úshin 134 adamǵa 40,6 mln teńge syıaqy tólenip, 7 memlekettik qyzmetshi gramotamen marapattaldy», - dep jazylǵan ulttyq baıandamada.

Agenttiktiń málimeti boıynsha, 2022 jyly 83 adam izdestirilgen.

«Qabyldanǵan sharalardyń arqasynda olardyń sany 59-ǵa deıin azaıdy. Eldiń sheginen tys jerde 6 adam ustaldy, olardyń bireýi 11 jyldan astam izdeýde bolǵan», - delingen resmı málimette.