«Antıkor alyp ketse she?»: Dosaev kartına syılaǵan turǵynǵa jaýap berdi

<p>ALMATY. KAZINFORM - Erbolat Dosaev Áýezov aýdanynyń turǵyndarymen kezdesý kezinde oǵan almatylyq turǵyn erekshe syılyq jasady.</p>

Almaty turǵyny shahar basshysyna qaladaǵy birqatar túıtkildi máseleni sheshkeni úshin alǵysyn jetkizdi. 

«Eń aldymen, elektr eseptegishter quny 141-den 115 myńǵa deıin tómendegeni úshin, úsh fazaly jáne bir fazaly eseptegish úshin alǵysymdy bildiremin. Bir ǵana qyrkúıek aıynda 90 mln astam teńge únemdeldi. Budan bólek, avtobýs jolaǵyn jasadyńyz, Aqjar jáne Shuǵyla yqsham aýdandarynyń turǵyndary atynan kósheni uzartyp bergenińiz úshin rahmet aıtamyn. Bul aýmaqqa ortalyq sý qubyry men káriz júıesi de tartylady. Siz árbir máselege jaýapkershilikpen qaradyńyz», - dedi almatylyq.

Qala ákiminiń jumysyna rıza bolǵan turǵyn kartına syılady. Onda beton bloktaryn kóterip turǵan Erbolat Dosaev beınelengen. 

«Meni Antıkor alyp ketse she? Syılyqqa rahmet, ony áıelime beremin», - dep kúldi Erbolat Dosaev.