Antarktıda sýlaryn alǵash júzip ótken qazaq qyzy týraly ne bilemiz

<p>ORAL. KAZINFORM &mdash; Batys Qazaqstan oblysynda týyp-ósken Ánel Sytdyqova óz ómirindegi taǵy bir bıikti baǵyndyrdy.</p>

Ánel Sytdyqova bul joly 12 qarashada Antarktıdanyń muzdaı sýlaryn júzip ótýge qatysty. Ol 750 metr qashyqtyqty 18.58.95 mınýtta júzip ótti. Sýdyń temperatýrasy -1,4 gradýsty kórsetken.

Óziniń aıtýynsha, Dreık buǵazy arqyly eki kúnge ulasqan júzýden keıin Antarktıdaǵa 10 qarasha kúni kelgen.

«IISA (International Ice Swimming Association, Halyqaralyq qysqy júzý qaýymdastyǵy) uıymdastyrýshysy ári negizin salýshy Ram Barkaı basshylyq etken bizdiń topqa Ońtústik Afrıka Respýblıkasy, AQSh, Frantsııa, Ulybrıtanııa, Majarstan, Malaızııa, Aýstralııa jáne Qazaqstannan 13 júzýshi jáne bir doktor kirdi. Aramyzda Ice Seven, Lynton Mortensen, Oceans Seven tıtýldaryn ıelengen álemdegi úsh adamnyń biri Kate Steels (Keıt Stıl) sııaqty ataqty júzý sheberleri boldy», - deıdi Ánel Sytdyqova. 

Foto, vıdeo: Ánel Sytdyqovanyń jeke muraǵatynan

Onyń aıtýynsha, Antarktıdada bolǵan on kúnniń ishinde júzý úshin qolaıly sátti kútken. Onyń ústine kemede basqa 150 jolaýshy bolǵandyqtan, korabl tártibin de saqtaý kerek edi. 

«Degenmen biz Antarktıdanyń sýlaryn júzip óttik. Men úshin bul óte salqyn boldy. Sýdyń salqyndyǵy -1,4 gradýs bolsa, jeldiń jyldamdyǵy saǵatyna 35 shaqyrym edi. Aısbergter men pıngvınder arasynda júzýdiń áseri bólek. Antarktıda muzdaı qushaǵyn ashqan az ǵana adamnyń qatarynda bolý men úshin erekshe oqıǵa boldy», - deıdi Á.Sytdyqova. 

Ánel Sytdyqova – trıatlonnan Qazaqstannyń tuńǵysh temir hanshaıymy, birinshi aıronmen (Ironman) jáne ýltramen (Ultraman). 

Qazaq qyzy budan bes jyl buryn qazaqstandyqtardan alǵash ret áıgili La-Mansh buǵazyn (38 km) gıdrokostıýmsiz júzip ótken edi. 

Foto, vıdeo: Ánel Sytdyqovanyń jeke muraǵatynan

Ánel 2022 jyly jazda AQSh-ta Manhetten araly aınalasynda 20 kópirdi aınalyp, 48,5 km qashyqtyqty baǵyndyrdy. Sodan keıin Los-Andjeleste álemdegi eń uzaq marafondyq qashyqtyqtardyń biri – Katalına buǵazyn (34 shaqyrymǵa jýyq) toqtamastan júzip ótti. 

La-Mansh (34 km) jáne Manhetten aınalysyndaǵy 20 kópirdi (48 km) qosqanda, Katalına álemdegi ashyq sýda júzýden úshtik tájdiń (Triple Crown of Open Water) quramyna enedi.

Sondyqtan Ánelge «Úsh tájdiń hanshaıymy» ataǵy berilip, ol «Úshtik táj» (Triple Crown) klýbyna múshe bolyp qabyldandy. TMD kóleminde eshkim mundaı jetistikke jetken emes. 
Á.Sytdyqova óziniń otbasymen Anglııada, London mańynda turyp jatyr.

Eske sala keteıik, budan buryn oraldyq kelinshektiń áıgili La-Mansh buǵazyn júzip ótkenin  jazǵan bolatynbyz.

Sondaı-aq Ánel Sytdyqova AQSh-taǵy eki uzaq qashyqtyqty júzip ótkisi keletinin aıtqan bolatyn.

Qazaqstandyq áıel AQSh-ta 48 shaqyrym qashyqtyqty júzip ótti.