Antares qarjy pıramıdasyn quryp, 50 mln teńgeni qaltasyna basqan áıel 6 jylǵa sottaldy

QOSTANAI. QazAqparat - Pıramıda uıymdastyrý faktisin Qarjy monıtorıngi agenttiginiń Qostanaı oblysy boıynsha departamentiniń qyzmetkerleri anyqtady, dep habarlaıdy QazAqparat.

2021 jyly sottalýshy «Antares» qarjy pıramıdasynyń qurylymdyq bólimshesin basqarǵan jáne bir top adam bolyp aldyn ala sóz baılasý arqyly azamattardy shetel valıýtasyndaǵy qolma-qol aqsha salýǵa tartqan jáne kún saıyn kepildendirilgen paıda alyp otyrasyń dep jalǵan aqparat taratqan.

Bul áreketimen 33 jábirlenýshige jalpy somasy 50 mln teńgege jýyq materıaldyq zalal keldi.

Sot aıyptyny 6 jyl merzimge bas bostandyǵynan aıyrdy.

Sottalýshynyń 3 jas balasynyń bolýy jáne júktiligin esepke ala otyryp, jazany oryndaý 5 jylǵa keıinge qaldyryldy.

Úkim zańdy kúshine engen joq.