Antalııada Tańjaryq Joldyulyna arnalǵan halyqaralyq ádebı konferentsııa ótti

ANTALIıA. QazAqparat – Túrkııanyń Antalııa qalasyndaǵy Akdeniz ýnıversıtetinde qazaqtyń uly aqyny Tańjaryq Joldyulynyń 120 jyldyq mereıtoıyna oraı Halyqaralyq ádebı konferentsııa ótti. Sharany uıymdastyrýǵa Halyqaralyq «Tańjaryq-zertteý qory» qoǵamy, Dúnıejúzi qazaqtarynyń damý qory, Akdeniz ýnıversıteti, Eýrazııa Jazýshylar Odaǵy jáne «Túrik Oshaǵy» birlestigi atsalysty, dep habarlaıdy QazAqparat.

Konferentsııanyń basty maqsaty- Tańjaryq Joldyulynyń ómirderegi men shyǵarmashylyǵyn nasıhattaý, Túrik álemine tanystyrý, Qazaq-Túrik ádebı, mádenı baılanysyn nyǵaıtýǵa úles qosý.

Shara barysynda Túrik tiline aýdarylǵan 22 qazaq aqynynyń óleńderi men ómirbaıany toptastyrylǵan jınaqtyń tusaýy kesildi (toptastyrǵan M. Mamythan). «Tańjaryq» jýrnaly tanystyryldy, Qazaqstannan barǵan aqyndar óleńderin oqydy, Tańjaryq shyǵarmalaryna taldaý jasaldy, óner adamdary Tańjaryqtyń ánderin shyrqady.

Túrkııadaǵy belgili jazýshy, ǵalym, qoǵam qaıratkerleri Tańjaryq aqynnyń qıyn da qıly ómirine toqtalyp, shyǵarmalary, artynda qalǵan baı muralaryna taldaý jasaı otyryp, «Tańjaryq Joldyuly - Túrki áleminiń ortaq qundylyǵy» degen baǵasyn berdi.

Tańjaryq Joldyuly – aqyn, 1903 jyly naýryzdyń 15 juldyzynda Shynjań Іle Qazaq avtonomııaly oblysyna qarasty Kúnes aýdanyndaǵy Qamysty degen aýylda dúnıege kelgen. Alǵashqy bilim jolyn týǵan aýlynda bastaǵan, 1922 – 1925 jyldary Qazaqstanda Kegen, Narynqol aýdandarynda jeti jyldyq mektepte oqyǵan. Qazaq jazýshylarynyń eńbekterimen keńinen tanys bolǵan. Ózi de óleń jazyp, aıtysqa qatysqan.

Tańjaryq Joldyuly Shyńjańda muǵalim bolyp qyzmet atqarǵan, «Іle» gazetinde redaktorlyq qyzmet istedi. Keıinnen 1940 - 1946 jyldary Qytaıdaǵy solaqaı saıasattyń kesirinen tutqyndalyp, túrmege jabylǵan. Onyń «Jastaryma», «Osy tań kimniń tańy?», «Oqyp kór gazetimdi», «Kóńilim qaldy, toryqty», «Abaqtyda kim jatyr?», «Aqyn syry», «Elime» óleńderi osy kezde jazylǵan. «Ótken kúnderim» (1942), «Qoshtasý» (1941 - 1942), «Qasqyr men Bóribasar» (1934 - 1943), t.b. tolǵaý jyrlary men «Nazıgúl» (1943) dastanynyń avtory. «Alǵashky jınaq» (Qulja, 1948), «Armantaý» (1974) jınaqtary jaryq kórgen. 1947 jyly aqyn ómirden ozdy.