Antalııada qansha qazaqstandyq demaldy
«Qazaqstannan 2013 jyly 260 myń týrıst kelse, 2014-te 269 myń adam, 2015 jyly 268 myń, 2016 jyly Reseımen aradaǵy oqıǵaǵa baılanysty 125 myń demalýshy keldi. Bıyl, 2017 jyldyń qarasha aıynyń sońyndaǵy málimet boıynsha 237 myń adam Qazaqstannan keldi. Bul byltyr kórsetkishke qaraǵanda 88 paıyzǵa artqan. Bıyl eń kóp týrıst Reseıden keldi. Sosyn, Germanııa, úshinshi Ýkraına, odan keıin Anglııa, odan keıin Qazaqstan tur», - dedi Ibrahım Adjar.
Ibrahım Adjar QazAqparat tilshisimen bolǵan suhbatta qazaqtardy antalııalyqtar baýyrlary retinde qarsy alatynyn aıtty.
«Týrızm salasynda Qazaqstanmen baılanystarymyz bar. Biz olardy baýyrlarymyz dep sanaımyz. Antalııa qalasynda týrızm salasynda ótetin kórmelerge qazaqstandyq kompanııalar belsendi qatysady. Qazaqstannan keletin týrıster alǵashqy bestikke kiredi. Týrızm salasynda Túrkııada Ystanbul men Antalııany ataýǵa bolady. Jalpy, 2014 jyly Antalııaǵa 12 mln týrıst keldi. 2016 jyly Reseımen arada syzat túskende 6,5-7 mln týrıst kelse, bıyl kelýshilerdiń sany 10 mln-nan asty. Antalııada týrıster úshin arnaıy 625 000 oryn bar. Antalııada 1 myńǵa jýyq «juldyzdy» otelder bar. Onyń 400-i «5 juldyzdy» qonaq úı. Mysaly, Ispanııanyń ózinde 400 «5 juldyzdy» otel joq. Antalııada 640 shaqyrymdyq jaǵalaý, 1 650 týrıstik agenttigi bar. Jaz maýsymynda 3 myńnan astam gıdter jumys isteıdi. Týrızm salasyndaǵy halyqaralyq uıymdardyń anyqtaýy boıynsha Antalııada 200-ge jýyq «kógildir baıraq» dep atalatyn taza, senimdi sýǵa shomylýǵa arnalǵan jaǵalaýlar bar. Onda adamdar erkin, qaýipsiz demala alady. Antalııada 1000-ǵa jýyq ejelgi qala bar. Bizdiń negizgi mindetimiz - sheteldikterge jaǵdaı jasaý», - dedi Ibrahım Adjar.
Antalııa qalasy Mádenıet jáne týrızm basqarmasynyń basshysy bir týrıst shamamen qansha aqsha jumsaıtynyn aıtty.
«Bir týrıst Antalııada demalýǵa shamamen 700 dollar aqsha jumsaıdy. Golf oınaýǵa, 5 juldyzdy qonaq úıge demalýǵa kelgender odan da kóp aqsha qaldyrady. Antalııada týrızm salasynda qoldanylatyn azyq-túlikten bastap, barlyq qajetti zattar Túrkııada jasalǵan. 98 paıyz jergilikti ónim paıdalanylady. Jalpy Túrkııa boıynsha jylyna 35 mln týrıst keletin bolsa, sonyń 65 paıyzy Antalııada demalady. Týrıster kem degende 1 aptaǵa keledi. Týrısterge jaz maýsymynda qyzmet kórsetetin 200 myńǵa jýyq adam jumyspen qamtylady», - dedi ol.
Aıta keteıik, bul kúnderi Qazaqstan-Túrkııa dıplomatııalyq qatynastarynyń 25 jyldyǵy jáne Qazaqstan Táýelsizdiginiń 26 jyldyǵyna oraı Túrkııa Respýblıkasynda Qazaqstan jýrnalısteriniń baspasóz týry ótýde. Týr aıasynda jýrnalıster Ankara qalasynda 25 jyldyqqa oraı uıymdastyrylǵan saltanatty jıyn men ǵylymı konferentsııaǵa qatysty. Osydan keıin Antalııa qalasyndaǵy týrızım oshaqtaryn aralap kórdi. Baǵdarlama boıynsha qazaq jýrnalısteri Gazıantep qalasyndaǵy sırııalyq bosqyndardyń lagerine baryp, olardyń jaǵdaıymen tanysady dep josparlanǵan.