Ańshy kýáligin jyl saıyn tirkeý qajet pe – Sklıar jaýaby

ASTANA. QazAqparat – QR Premer-Mınıstriniń birinshi orynbasary Roman Sklıar Májilis depýtattarynyń ańshy kýáligin jyl saıyn tirkeýge qatysty saýalyna jaýap berdi, dep habarlaıdy QazAqparat tilshisi.

«Qazirgi ýaqytta «Ańshy kýáligin berý» memlekettik qyzmeti «E-lıtsenzııalaý» portaly arqyly tolyq avtomattandyrylǵan. Memlekettik qyzmet kórsetý protsesin avtomattandyrý kórsetiletin qyzmetti berýshi men kórsetiletin qyzmetti alýshy arasyndaǵy sybaılas jemqorlyq táýekelin boldyrmaýǵa, sondaı-aq ańshylar kýálikteriniń biryńǵaı tizilimin qurýǵa baǵyttalǵan. Tsıfrlyq damý, ınnovatsııalar jáne aeroǵarysh ónerkásibi mınıstrligi bıyl eGovMobile qosymshasyn jetildirý boıynsha jumysty aıaqtady. Sonymen, ótinish berýshiler eGovMobile-dyń úzdiksiz jumysyn qamtamasyz etý maqsatynda elektrondyq tsıfrlyq qoltańbanyń kómegimen avtorızatsııa shartymen ınternetke qosylmaı «tsıfrlyq qujattar» servısin jyldam paıdalaný múmkindigine ıe», - dedi birinshi vıtse-premer.

Onyń atap ótýinshe, osyǵan baılanysty ańshy kýáligin qaǵaz tasyǵyshta berý orynsyz. Ańshy kýáligin jyl saıyn tirkeý rásimin engizý jeke tulǵalarǵa qosymsha quqyqtyq jáne qarjylyq júkteme týǵyzady.

«Sonymen qatar, qarý ańshynyń kýáligine sáıkes kelmeıtinin atap ótken jón, sáıkesinshe ańshy kýáligin jyl saıyn tirkeý azamattar satyp alǵan jáne ań aýlaýda qoldanylatyn atys qarýynyń sanyn baqylaýdyń tıimdi mehanızmi bola almaıdy. Osyǵan baılanysty ańshy kýáligin jyl saıyn tirkeýdi engizý orynsyz», - dedi Roman Sklıar.

Foto:paryz.kz