Ańshy kýáligi tsıfrlandyryldy: onlaın qyzmetter boıynsha 66 joba júzege asady
Bıyl memlekettik qyzmetterdi onlaınǵa kóshirý arqyly azamattardyń iskerlik jáne turmystyq máselelerin sheshýin jeńildetýge jáne jedeldetýge baǵyttalǵan 66 tsıfrly bastama júzege asyrylyp jatyr.
«Memleket basshysynyń memlekettik organdarǵa jáne olardyń halyqpen ózara baılanysyna bıýrokratııa yqpalynyń joǵary ekeni týraly pikirine súıene otyra, sondaı-aq álemdik tájirıbeni eskerip, sybaılas jemqorlyq pen bıýrokratııamen kúrestegi birden-bir tıimdi jol — tsıfrlandyrý dep senimmen aıta alamyz. Bizdiń basty mindetimiz — árbir azamattyń tsıfrlandyrýdyń naqty nátıjesin sezinýin qamtamasyz etý», - dedi Ǵ. Qoıshybaev.
Qazir tsıfrly bastamalardyń 41-i tolyq nemese pılottyq rejımde qoljetimdi. Mysaly, kúni keshe Ádilet mınıstrligi onlaın rejımde notarıaldy kýálandyrylǵan senimhat berý qyzmetin iske qosty. Alǵashqy eki kúnde 60-tan astam qujat rásimdeldi.
«Bul qyzmetke bankter qyzyǵýshylyq tanytyp otyr. Qazir tehnıkalyq múmkindikter pysyqtalyp jatyr. Jospar boıynsha bir aıdyń ishinde ekinshi deńgeıli bankterdiń mobıldi qosymshalarynda «onlaın notarıýs» qyzmeti paıda bolýy múmkin. Biz notarıýstarmen jáne azamattarmen keri baılanys júrgizip jatyrmyz, alǵashqy oń pikirler de bar», - dedi ádilet vıtse-mınıstri Bekbolat Moldabekov.
Sondaı-aq, Іshki ister mınıstrligi 8 jobany júzege asyryp jatyr. Onyń ishinde jalǵan nómirlerden keletin qońyraýlardy buǵattaý (34 mln qońyraý buǵattaldy), avtokólikterdi onlaın qaıta tirkeý (bul qyzmetti 3,7 mln azamat paıdalandy), júrgizýshi kýáligin onlaın aýystyrý (bul qyzmetti 122 myń azamat aldy) jáne t.b. qyzmetter bar.
Al, Ekologııa mınıstrligi ańshy kýáligin tsıfrlandyrdy. Osy qujatty rásimdeýdi josparlaǵan ár azamat 1 qańtardan bastap, onyń tek elektrondy túrde ǵana beriletinin bilýi mańyzdy. Bul qujattyń qaǵaz nusqasyn birge alyp júrý qajettiligin joıady. Osy rette muqabaly ańshy kýáligi úshin tólenetin 3 AEK mólsherindegi qosymsha alym alynyp tastaldy.
Sondaı-aq, Eńbek jáne halyqty áleýmettik qorǵaý mınıstrligi, Densaýlyq saqtaý mınıstrligi, Energetıka mınıstrligi jáne basqa da memlekettik organdar ókilderi tsıfrly ónimder týraly baıandady.
Baıandamashylardy tyńdaǵan Premer-Mınıstrdiń orynbasary Ǵ. Qoıshybaev azamattardyń usynystary men shaǵymdaryn eskere otyryp, keıbir onlaın qyzmetterdi pysyqtaý qajettigin atap ótti.
«Tsıfrlandyrý máselesi Úkimet Apparatynyń qatań baqylaýynda. Memlekettik qyzmetterdi tsıfrlandyrý protsesi úzilmeýi kerek. Sondaı-aq, ár jańa qyzmettiń iske qosylǵany keńinen habarlanyp, azamattardy bul qyzmetterdi qalaı paıdalaný kerektigi týraly aqparattandyrý óte mańyzdy», - dedi Ǵ. Qoıshybaev.