«Ańsaǵan sábı»: Jylyna bir ret EKO jasaýǵa múmkindik bolady

NUR-SULTAN. QazAqparat – Bıyl 1105 EKO-ǵa 943 mln teńge qarastyrǵan. Bul týraly QR Densaýlyq saqtaý mınıstrliginiń resmı ókili Baǵdat Qojahmetov málim etti, dep habarlaıdy QazAqparat tilshisi.

«Respýblıkalyq elektrondyq densaýlyq saqtaý ortalyǵynyń málimetin boıynsha elimizde 9 myń 467 áıel bedeýlik dıagnozymen esepte tur. Kelesi jyly iske qosylatyn «Ańsaǵan sábı» baǵdarlamasyna jasandy jolmen uryqtandyrý arqyly bala súıýge úmitti kez kelgen juptar qatysa alady», - dedi resmı ókil Ortalyq kommýnıkatsııalar qyzmetinde.

Onyń sózine qaraǵanda, osy baǵdarlama aıasynda patsıent jylyna bir ret EKO jasaı alady.

«Áleýmettik medıtsınalyq saqtandyrý qory bıyl 1105 EKO-ǵa 943 mln 800 myń teńge qarastyrǵan. Prezıdenttiń joldaýyna sáıkes, EKO kvotany 7 myńǵa jetkizý kerek, ıaǵnı 7 ese kóbeıtý qajet. 943 mln-dy 7 esege kóbeıtsek, tıisti soma shyǵady», - dedi B. Qojahmetov.

Budan buryn habarlanǵandaı, elimizde EKO kómegimen 22 myńnan astam sábı dúnıege keldi.

Aıta keteıik, jaqynda Qazaqstan halqyna Joldaýyn jarııa etken QR Prezıdenti Qasym-Jomart Toqaev 2021 jyldan elimizde «Ańsaǵan sábı» arnaýly baǵdarlamasy iske qosylatynyn aıtty.

Osy oraıda «EKO» baǵdarlamasymen kvotany 7 myńǵa deıin, ıaǵnı, 7 ese kóbeıtý qajet.