Ańsaǵan sábı: Taǵy 3 myńǵa jýyq áıel ana atanǵaly otyr

ASTANA. QazAqparat – Elimizde júkti áıelder arasynda ólim-jitim azaıdy. Sonymen qatar «Ańsaǵan sábı» baǵdarlamasy aıasynda barysynda 6 myńnan astam áıel júkti bolyp, 3 200 sábı dúnıe esigin ashty. Bul týraly Densaýlyq saqtaý mınıstri Ajar Ǵınııat málim etti, dep habarlaıdy QazAqparat tilshisi.

«Elimizde jyl saıyn 400 myńnan astam áıel bosanady. Júkti áıelderdiń 99%-y medıtsına qyzmetkerleriniń jiti baqylaýynda. Týa bitken kemshilikterdi anyqtaý úshin júkti áıelderdi skrınıngpen qamtý 10%-ǵa artty. Ótken jyly klınıkalyq hattamalardy jetildirý, júkti áıelderdi emdeýge jatqyzýdy naqty baǵyttaý, der kezinde telemedıtsınalyq konsýltatsııalar jáne sanavıatsııalyq ushýlardy uıymdastyrýdyń nátıjesinde aýyr jaǵdaıdaǵy 1 myńnan astam áıeldiń ómiri saqtap qalyndy», - dedi Ajar Ǵınııat Úkimet otyrysynda.

Mınıstrdiń málimdeýinshe, medıtsınalyq kómekti uıymdastyrýdy jaqsartý nátıjesinde júkti áıelderdiń ólimi 100 myń tiri týylǵan sábıge shaqqanda 2,6 esege tómendedi.

Odan ári Ajar Ǵınııat bedeýlik máselesin kóterdi. Aıtýynsha, bedeýlik otandyq densaýlyq saqtaý salasyndaǵy aıtýly problemalardyń biri. Ony sheshý eldegi demografııalyq jaǵdaıdy arttyryp, ártúrli sebepterge baılanysty sábı súıý múmkindiginen aırylǵan áıelderge múmkindik beredi.

«Memleket basshysynyń tapsyrmasyna sáıkes bizdiń mınıstrlik «Ańsaǵan sábı» baǵdarlamasyn iske asyrýdy jalǵastyrýda. Osy kúnge deıin 14 000 áıelge ekstrakorporaldyq uryqtandyrý qyzmeti usynyldy. Baǵdarlamany iske asyrý barysynda 6 myńnan astam áıel júkti bolyp, 2 800 otbasynda kópten kútken 3 200 náreste dúnıege keldi. Qazir 3 myńǵa jýyq júkti áıel sábıli bolǵaly otyr. Atalǵan baǵdarlamaǵa «Deni saý ult» ulttyq jobasy sheńberinde jyl saıyn 7 myń kvota bólý kózdelgen», - A. Ǵınııat.