Ańsaǵan sábı: Shyǵys Qazaqstanda úshem dúnıege keldi

ÓSKEMEN. QazAqparat – Shyǵys Qazaqstan oblysynda «Ańsaǵan sábı» baǵdarlamasy boıynsha EKU arqyly úshem dúnıege keldi, dep habarlaıdy QazAqparat tilshisi.

«Áleýmettik medıtsınalyq saqtandyrý qory» ShQO fılıaly baspasóz qyzmetiniń málimetine súıensek, 32 jastaǵy Semeı qalasynyń turǵyny EKU arqyly úsh balanyń anasy atandy.

Ol merziminen buryn – júktiliktiń 34-shi aptasynda bosanǵan. Nárestelerdiń salmaǵy – 2 keli 280 gramm, 2 keli 300 gramm jáne 2 keli 200 gramm.

«Otbasymyz bul baqytty 10 jyldan astam ýaqyt kútti. Byltyr «Ańsaǵan sábı» baǵdarlamasy aıasynda densaýlyq saqtaý basqarmasynyń jumys komıssııasynyń maquldaýymen EKO-dan ótýge kvota aldym. Bári oıdaǵydaı ótip, bala kóterdim. Qýanyshymyzda shek joq. Osy baǵdarlamanyń arqasynda qanshama otbasy sábıli bolyp jatyr», - deıdi úshemniń anasy Maqpal.

Aıta keteıik, 2022 jyldyń birinshi aıynda óńir boıynsha 23 egiz jáne bir úshem jaryq dúnıe esigin ashqan.

Bıyl 488 áıelge «Ańsaǵan sábı» baǵdarlamasy sheńberinde kvota berilmek.