Ańsaǵan sábı: ShQO-da qos úshem dúnıege keldi

ÓSKEMEN. QazAqparat – Shyǵys Qazaqstan oblysynda eki otbasy ata-ana bolý baqytyna ıe bolyp, árqaısysy birden úsh balamen tolyqty, dep habarlaıdy QazAqparat Densaýlyq saqtaý mınıstrligi saıtyna silteme jasap.

Úsh jyl kútkennen keıin Shemonaıha turǵyny, 28 jastaǵy Marına Strokan men onyń jubaıy úsh balanyń ata-anasy boldy. Júktiliktiń 34-aptasynda jas ananyń Sofııa, Vıktorııa jáne Darıa atty qyzdary týdy. Bosaný kesar tiligi arqyly júzege asyryldy. Bul – otbasyndaǵy tuńǵysh balalar.

«Qyzdardyń atyn ákesi qoıdy», - dep qýanyshymen bólisti jas ana.

Áıel kelesi aptada ózin jáne úshemderdi shyǵarady dep úmittenedi, óıtkeni qyzdardyń árqaısysy eki keli salmaq jınady.

Al, Óskemen qalasynyń turǵyny Jansaıa Ahmadıeva men onyń kúıeýi toǵyz jylǵa jýyq ýaqyttan beri bala týraly armandaǵan bolatyn. Bıyl reprodýktıvti tehnologııalar men «Ańsaǵan sábı» baǵdarlamasynyń arqasynda jas áıel ana atandy. Ol áleýmettik medıtsınalyq saqtandyrý qorynan kvotanyń esebinen qymbat turatyn EKU rásiminen tegin ótti.

Ata-anasy jańa týǵan úshemderdiń esimin Eraly, Erasyl jáne Zere dep qoıǵan.

«Uldar mazasyz, qazirdiń ózinde minez kórsetedi. Al, qyzym ózime uqsaıdy, salmaqty», - deıdi úshemniń anasy.

Jalpy, jyl basynan beri ShQO-da úsh úshem týǵan.