«Ańsaǵan sábı»: ShQO-da bir jylda 212 náreste dúnıege keldi
ShQO ÁMSQ baspasóz qyzmetiniń málimetinshe, óńirde byltyr «Ańsaǵan sábı» baǵdarlamasy aıasynda 488 kvota bólingen.
2022 jyly oblys boıynsha bala súıe almaı kele jatqan 792 jup tirkeldi. 293 áıelge ekstrakorporaldy uryqtandyrý júrgizildi.
Osy rette, ShQO boıynsha otbasyn josparlaý jáne reprodýktıvti densaýlyq jónindegi úılestirýshi Nadıra Slıamhanova «Ańsaǵan sábı» baǵdarlamasyna qatysýǵa sheshim qabyldaǵan balasyz erli-zaıyptylar úshin is-qımyl algorıtmin jáne MÁMS esebinen EKU-ny qalaı alýǵa bolatyndyǵy týraly aıtyp berdi.
«Patsıent MÁMS sheńberinde reprodýktıvti tehnologııalar boıynsha qyzmet kórsetetin medıtsınalyq uıymdy óz betinshe tańdaıdy. Sodan keıin joǵary tehnologııalyq medıtsınalyq qyzmetter komıssııasynyń qorytyndysyn alý úshin tirkelgen jeri boıynsha óziniń ýchaskelik dárigerine júginýi qajet. Ýchaskelik dáriger patsıentti bedeýlikten zardap shegetin dıspanserlik naýqastardyń elektrondy regıstrine engizedi. Tıisti tekserýden ótkennen keıin jáne bedeýliktiń sebepterin anyqtaǵannan soń 12 aı ishinde beıindi mamannyń qorytyndysy negizinde ýchaskelik dáriger MÁMS esebinen kómekshi reprodýktıvti tehnologııalardy júrgizý týraly máseleni sheshý úshin patsıenttiń qujattaryn joǵary tehnologııalyq medıtsınalyq qyzmetter jónindegi komıssııaǵa jiberedi», - deıdi ol.
Oń sheshim qabyldanǵan kezde gospıtalızatsııa bıýrosynyń portalynda patsıent qujattardyń tolyq paketimen tirkeledi. Oǵan qyzmetterdi alýdyń kúni men ýaqyty aıtylady.
Aıta keteıik, bıyl bul qyzmetterdi elimizdiń jeti óńirinde Astana, Almaty, Shymkent, Aqtóbe, Atyraý, Jambyl, Qaraǵandy oblystarynda ornalasqan 19-ǵa jýyq medıtsınalyq uıym MÁMS aıasynda tegin kórsetedi.
«Bıyl qatysýshylarǵa arnalǵan baǵdarlamada 42 jasqa deıingi shekteýler qarastyrylǵan. Kóp qıyndyqtan ótip, kópten kútken júktiliktiń oń synaǵyn alý jetkiliksiz. Dárigerler úshin de, bolashaq analar úshin de júktiliktiń qaýipsiz aıaqtalýy mańyzdy, sondyqtan áıelder EKU-dan keıin bosanǵanǵa deıin mamandardyń únemi baqylaýynda bolady», - deıdi Nadıra Slıamhanova.