«Ańsaǵan sábı»: Qyzylordada úshem dúnıege keldi

QYZYLORDA. QazAqparat - Baıqońyr qalasynda turatyn 31 jastaǵy Áıgerim Álimhanova «Ańsaǵan sábı» baǵdarlamasy aıasynda Aılın, Anel, Adel esimdi úshemdi dúnıege ákeldi, dep habarlaıdy QazAqparat tilshisi.

«Bul - jas ananyń alǵashqy júktiligi. Náresterler 1180, 1200, 1400 gramm salmaqpen dúnıege keldi. Sol kúni sanıtarlyq avıatsııa jelisi arqyly oblystyq perınataldyq ortalyqqa jetkizildi. Endi birshama ýaqyt ortalyq neonatologtarynyń erekshe kútiminde bolady. Qazir anasy men nárestelerdiń densaýlyq jaǵdaıy jaqsy», - dep málim etti oblystyq densaýlyq saqtaý basqarmasynan.

«Ańsaǵan sábı» arnaýly baǵdarlamasy aıasynda 2021 jyly oblysqa 281 kvota bólinip, ótken jyldyń qarasha aıyna deıin tolyq ıgerildi. Sol jyly baǵdarlama boıynsha EKU arqyly 119 bala ómirge keldi. Olardyń arasynda 3 otbasynda egiz sábıler jaryq dúnıe esigin ashqan. Byltyr baǵdarlama negizinde 277 kvota bólingen.