Ańsaǵan sábı: Atyraý oblysynda úsh jylda 704 kvota bólingen
Oblystyq densaýlyq saqtaý basqarmasy ana men bala densaýlyǵyn qorǵaý bóliminiń basshysy Aqmaral Saqypovanyń aıtýynsha, jyl saıyn «Ańsaǵan sábı» baǵdarlamasymen úsh jylda bólingen kvota 704-ke jetken.
«Atyraý oblysynda Memleket basshysynyń tapsyrmasymen iske asyrylyp jatqan «Ańsaǵan sábı» baǵdarlamasymen náresteli bolýdy kózdegen analar sany az emes. Soǵan baılanysty 2021 jyly 234 kvota bólingen edi. Onyń ishinde 135 kvota ıgerilip, 54 otbasy sábıli boldy. Arnaıy baǵdarlama aıasynda ómirge kelgen nárestelerdiń arasynda 6 egiz bar», -deıdi Aqmaral Saqypova.
Onyń aıtýynsha, byltyr atalǵan baǵdarlamaǵa qatysatyn analar úshin 237 kvota bólingen. Bul kvotanyń bári ıgerilgen.
Al, bıyl «Ańsaǵan sábı» baǵdarlamasymen atyraýlyq analar úshin 233 kvota bólinip otyr. Onyń ishinde 33 kvotany ıgerý jergilikti jerdegi eko-ortalyqqa berilgen.
«Bul baǵdarlamaǵa qatysýshylarǵa beriletin kvotany bólýdiń ózindik tártibi bar. Birinshiden, erlik-zaıyptylardyń jasy 49-dan aspaýy qajet. Ekinshiden, medıtsınalyq tekserýden ótip, sábı súıgisi keletin ananyń densaýlyǵynda kinárat bolmaýy tıis», -deıdi Aqmaral Saqypova.
Reprodýktolog-dáriger Gúlsara Basarovanyń pikirinshe, jergilikti dárigerler ózge elderdegi áriptesterimen jıi tájirıbe almasqan.
Jańa tehnologııalardy meńgergen. Bıyl Italııa, Reseı, Danııa jáne Frantsııaǵa tájirıbe almasýǵa barady.
«Bizdiń dárigerler álem elderindegi jańa baǵdarlamalarmen kýrstan ótip, túrli dıagnostıkany jasaýdy, taldaý júrgizýdi meńgergen. EKU ortalyqtary jańa tehnologııalarmen qamtamasyz etilgen», -deıdi Gúlsara Basarova.
Eske sala ketelik, budan buryn Atyraý oblysynda EKU-ǵa 233 kvota bólingenin habarlaǵan edik.