«Ańsaǵan sábı»: Atyraý oblysynda 54 ana sábı kútip júr

<p>ATYRAÝ. KAZINFORM &ndash; Bıyl Atyraý oblysynda &laquo;Ańsaǵan sábı&raquo; baǵdarlamasymen ekstrakorporaldy uryqtandyrýǵa 231 kvota bólingen. Qazir 54 ana sábı kútip júr.</p>

Atyraý oblysynyń bas reprodýktologi Gúlnár Esqaıyrovanyń málimetinshe, osy kezge deıin kvotanyń 218-i oryndalǵan. 

«Elimizde 5 jylǵa arnalǵan «Ańsaǵan sábı» baǵdarlamasy iske asyrylyp jatyr. Bıyl – atalǵan baǵdarlamanyń tórtinshi jyly. Sońǵy eki jylǵy kórsetkishpen salystyrǵanda, bıyl ekstrakorporaldy uryqtandyrýǵa beriletin kvota sany eki ese artty. Atyraý oblysynda osy baǵdarlamanyń aıasynda byltyr 51 sábı ómirge keldi. Onyń ishinde 6 egiz bar. Qazir 54 ana ómirge sábı ákelýdi kútip júr, -dep habarlady Gúlnár Esqaıyrova.

Onyń aıtýynsha, kvota alýǵa nıetti jup ózi tirkelgen emhanaǵa ótinish bildirýi qajet. Keıin bedeýlik boıynsha dıspanserlik baqylaýǵa alynady. Tolyq medıtsınalyq zertteý júrgizilip, oblystyq perınataldy ortalyǵynyń gınekolog-reprodýktologterge joldama beredi. 

Eske sala ketelik, budan buryn Atyraý oblysynda úshem dúnıege kelgenin habarlaǵan bolatynbyz.